Danskit avatangiisit illersorniarlugit akileerusunnerupput
Nunat Avannarliit Siunnersuisoqatigiivisa aamma Nunat Avannarliit Ministerrådiisa misissuisitsinerisa tamanna ersersippaat.
Taamatut misissuisitsinerup takutippaa, danskit Nunani Avannarlerni silap allanngoriartornerata iliuuseqarfiginissaanut piumassuseqarnerpaasut.
Danskit 72 procentii akileerusussuseqarnerusut, Finlandimiut 32 procentiinnaat aamma Islandimiut 45 procentii taamatut akiliinerunissaminnut piareersimapput.
Kristen Touborg Nunat Avannarliit Siunnersuisoqatigiivisa avatangiisinut ataatsimiititaliaani siulittaasumut tulliusoq oqarpoq, danskit taamatut piumassuseqarnerannut pissutaasut ilagigaat danskit kalaallillu attaveqatigiilluarnerat, taamaalillutillu danskit silap pissusaata allanngoriartornerinut sakkortuunut ilisimasaqarnerunerat.
Isumasiuineq naapertorlugu Nunani Avannarlerni innuttaasut 91 procentii isumaqarput, silap pissusaa pillugu 2009-mi Københavnimi ataatsimeersuartoqalerpat, nunarsuarmiut isumaqatigiissuteqarnissaat Nunat Avannarlermiut suleqatigiissutigiillutik anguniassagaat. Nunani Avannarlerni Ministerådimi sapaatip akunnerata tulliani Oslomi ataatsimiittoqalerpat silap allanngoriartornera oqaluuserineqassaaq.
