Danskit avaleraasartoorniarnissamut tapersersuipput
Inuit Ataqatigiit Folketingimut ilaasortaatitaannut, Sara Olsvigimut, Inuussutissalerinermut ministerip Dan Jørgensenip akissummini taama allappoq.
- Kalaallit Nunaat avaleraasartoorniarnermut atatillugu nunatut sinerialittut inissisimarusussaguni isumaqatigiissusiornermullu taamaattumut ilaarusussaguni, tamassumunnga tapersersuissaagut ikorfartuutissanillu assigiinngitsunik pisariaqarsinnaasunik tapiuteqassalluta, Dan Jørgensen akissummini ilaatigut taama allappoq.
Ilisimaneqareersutut Atlantikup avannarpasissuani avaleraasartoorniarnissamut EU, Norge Savalimmiullu isumaqatigiinnerannut Kalaallit Nunaat peqataatinneqanngilaq. Isumaqatigiissullu taanna naapertorlugu Kalaallit misileraallutik avaleraasartoorniarnerannut killilimmik taamaallaat ilaasinnaallutik, tassa tamarmik immikkut 4.000 tonsinik pisaqarsinnaallutik.
EU-mi aalisartut kalaallit misiliillutik avaleraasartoorniagassaannik 1.400 tonsinik siusinnerusukkut pisassinneqareernikuupput, ukioq mannali taamaaliotoqassanngitsoq, Inuussutissalerinermut ministeri nassuiaavoq. EU-mi aalisartut isumaqarput, kalaallit aalisartut 100.000 tons-inik misiliilluni aalisarnissamut pisassinneqarneri qaangiinerusoq, tamanna ataatsimiinnermi EUp Kalaallit Nunaannut nalunaarutigaa. Kalaallit Nunaata pisassiissutit annertussusaat aatsaat ’naammaginartunut’ appartippagit, EU 4.000 tonsimut aalisarnermut peqataasinnaasoq aamma oqaatigineqarluni.
Aalisarnermut Naalakkersuisup Finn Kalsenip avaleraasartoorniarnissamut isumaqatigiissuteqartoqarsimanera pillugu, tusagassiutitigut isornartorsiuinera, Inuussutissalerinermut ministerip aamma eqqaamaqquaa, tassami Finn Karlsenip isumaqatigiissut politikkikkut nalunaarnerliornerusoq oqaatigimmagu, oqaatigeqqillugulu, nunat pingasut isumaqatigiissusiornerminni Kalaallit Nunaat Islandilu peqatigissallugit soqutigisimaneraat.
- Kalaallit Nunaanniit taama nalunaartoqarnera arajutsisimanngilarput. Inuussutissalerinermut ministeri, Dan Jørgensen, folketingimi ilaasortamut Sara Olsvig-mut akissummini taama naqissusiivoq.
