Danskit arfineq-marluk Wuhanimit Danmarkimut tikitttut

Danskit kinamiut illoqarfiannit, virusimik tuniluuffiusumit, Wuhanimit Aalborgimi mittarfimmut ataasinngornerup unnuaani tikipput.

Danskit peqqinnissamut aqutsisoqarfia nittartakkamini taama paasissutissiivoq.

Napparsimasut sillimaniarnerannut aqutsisoqarfiup pisortaata danskit arfineq-marluk tamarmik tikikkamik ajunngitsut ilisimatitsissutigaa. Tikisinneqartut napparsimanerminnik takussutissiinngillat, taamaammat napparsimmavimmut unitsitsinissaq pisariaqarani.

AAMMA ATUARUK Københavnimi arnaq Kinameersoq coronavirusimik tunillatsissimanngitsoq

- Angerlartut tamarmik ullut tamaasa attaveqatigissavagut, taamaalilluta malittarisassanut paasitinneqarluarnissaat qulakkiissallutigu, Anette Lykke Petri Peqqinnissamut aqutsisoqarfiup nittartakkakkut nalunaarutaani allappoq.

Statens Serum Institutip danskit qimagussortinneqartut tamarmik coronavirusimik tunillatsissimanerlutik misissorneqarnissamut neqeroorfigissavai. Misissuineq vatpindi atorlugu iggissamit misissugassamik tigusinikkut ingerlanneqartarpoq.

Naak danskit arfineq-marluk coronavirusimik tunillatsissimanngikkaluartut sillimaniarneq tunngavigalugu angerlarsimaffimminnit aneqqusaajunnaarallartitaassapput.

AAMMA ATUARUK Ataatsimiititaliaq sulilerpoq: Coronavirusip nunatsinnut annguteratarnissaanut upalungaarsimavugut

Angerlarsimaffimmit aneqqusaannginneq ullunik 14-inik sivisussuseqarpoq, angerlarsimaannaqquneqartullu ullut tamaasa kissarnersiortassapput peqqinnissaqarfimmilu sulisunik attaveqateqartassallutik.

Coronavirusi nutaaq Kinami Wuhanimit nunap sinneranut nunanullu 25-t missaanniittunut siaruaappoq.

Nappaammik toqquteqartut Kinami 908-t missaanniipput, 40.000-iniillu amerlanerusut tunillatsissimasutut nalunaarsorsimallutik.

/ritzau/