Danskit arfanniartarnitsinnut illersuipput
Danskit tallimaagaangata taakkunannga sisamat Nunatsinni arfanniartarnitsinnut illersuisuupput. Danskillu pingasuugaangata taakkunannga marluk iluanaarutigalugulu arfanniartarnerup eqquteqqinneqarnissaanik danskit suliniuteqarnissaannut akerliupput.
Danmarkimi naatsorsueqqissaartarfiup ACNielsenip danskinik 1.006-inik isumasiuinerata tamanna ersersikkaa avisimi Politikenimi allaaserineqarpoq. ACNielsenimut isumasiuisitsisuuvoq uumasunut illersuiniaqatigiiffik WSPA.
- Misissuinerup takutippaa Kalaallit arfanniartarnerat ajorineqanngitsoq, iluanaarutigaluguli arfanniartarneq eqquteqqinneqassagaluarpat Kalaallit arfattassaat annertuumik ikileriaateqarsinnaasut ersersillugu, uumasunik illersuiniaqatigiiffiup WSPA-p paasissutissiisartua Lasse Bruun Politikenimi taama issuarneqarpoq.
Iluanaarutigalugu arfanniartarnerup eqquteqqinneqarsinnaanera Arfanniartarneq Pillugu Ataatsimiititaliarsuup maajimi ataatsimeersuarnissaani sammineqartussaavoq, tassungalu atatillugu iluanaarutigalugu arfanniartarnerup eqquteqqinneqarnissaanut akerliuniarluni
uumasunik illersuiniaqatigiiffik WSPA internettikkut atsiornernik maannamut 16.000-iusunik katersisimavoq, nunanut allanut ministerimut Per Stig Møllerimut, Naalakkersuisullu Siulittaasuannut Hans Enoksenimut nassiunneqartunik.
