Danskit arfanniarnermut tunngasuni akerliuffigineqaqaat
Danskit arfanniarneq pillugu ataatsimiiititaliarsuarmi ilaasortaasa taasinerannut akerliusut danskit ministeriunerannut Anders Fogh Rasmussenimut allakkasuaatitigut nassiussisaqattaarsimapput.
Soorlu naluneqanngitsoq arfanniarneq pillugu ataatsimiititaliarsuup ukioq manna ataatsimiinnerani naalagaaffeqatigiinneq sinnerlugu Danmarkimi ilaasortat aningaasarsiutigalugu arfanniartarnerup inerteqqutaaneranik atorunnarsitsiniarlutik japanimiut siunnersuutaannut tapersersuillutik taasipput. Uumasunik illersuiniaqatigiiffiit tupinnanngitsumik amerlasuut tamanna iluarinngilluinnarpaat. Tamanna peqqutigalugu danskit ministeriunerat allakkasuaatitigut akerliussunit allagarsisarpoq.
- Danmarkimi ilaasortat silaqarpianngitsutut innuttaasut kissaataat malinnagu uumasullu eqqarsaatiginngivillugit taasipput; Danmarkimi uumasunik illersuiniaqatigiiffiit arlallit tuluillu uumasunik illersuiniaqatigiiffiat ataaseq taama allapput.
Greenpeacemi ilaasortat 7000-eriarlutik tuluillu uumasunik illersuiniaqatigiiffiat ataaseq 6000-erluni Danmarkip Londonimi Berlinimilu aallartitaannut allassimapput.
Danmarkip nunanut allanut ministeria Per Stig Møller taaserlugu avatangiisinut ministeri Connie Hedegaard arfanniarneq pillugu ataatsimiiititaliarsuup ataatsimiinnerani peqataasalissasoq allakkat ilaanni siunnersuutigineqarpoq.