Danskit aningaasaleeqataanissaannut periarfissat Atassutip nuannaarutigigaa
- Torrak. Misissuiumasimanermik nalilersuiumasimanermillu siunnerfeqarsimaneq, Siverth K. Heilmann Danmarkip Qaqortumi, Nuummi Ilulissanilu mittarfiliortiternernut aningaasaleeqataanissaata misissuisoqarnissaanut nutaarsiassaq pillugu oqarpoq.
- Apeqqutini assigiinngitsuni taamatut Naalakkersuisut siulittaasuata statsministerillu akornanni aningaasalersuisinnaanermut oqariartuutigisimasaat Atassumminngaanniit uanga assut iluarisimaarlugu oqaatigissavara, Sivert K. Heilmann oqarpoq nangillunilu.
- Pingaartumik Inatsisartuni nutaanngortuni aatsaat taama annertutigisumik aningaasaliinissamik eqqartuisoqartillugu paasissutissat pisarialerujussuit, aalajangivinnissaq sioqqullugu tamakkua saqqummiunneqartariaqarnerinut isumaqarpunga, ilapertuutaasussat aalajangiiniarnissatsinnut taakkua pisariaqartitagut tassa tapersernartorujussuupput, Sivert K. Heilmann oqarpoq.
Danskit oqartussaqarfigisaannut attuumassuteqarsinnaasoq
Kikkunnit mittarfiliortiternernut aningaasanik taarsigassarsiniarnissaq, mittarfissanullu sanaartorneq ingerlatseqatigiiffimmit sorlermit suliarineqassanersoq apeqqutaatillugu, suliniutip nunanut allanut sillimaniarnermullu politikkimut attuumassuteqarsinnaasoq Danskit naalakkersuisuisa nalilerpaat.
Siverth K. Heilmannip kikkut aningaasaliisuutikkusunnerlugit maanna oqaatigerusunngilaa.
- Taanna massakkut, oqareernittut, nalilersugassat amerlanerannik oqareertillunga, taava oqarusunneruvunga, taanna massakkut ersarissumik aappimik naaggamillu, kikkullu tulluarnerunersut oqaatigeriissallugit pissusissamisoorsinnaanngilaq, Atassutip siulittaasua, Siverth K. Heilmann oqarpoq.