- Danmark koruunimiit euromut nuussappat Kalaallit Nunaat malinnaajumaarpoq, Kuupik Kleist Sermitsiamut oqarpoq.
Koruunit pappiarat aggorsimasullu naalagaaffiup aningaaserivissuani suliarineqartarput. Danmarkillu koruuni aningaasatut tunngavigisamisut unitsippagu, Kalaallit Nunaallu malinnaanngikkuni taava uagut danskit koruunii pappiarat aggornikullu nammineerluta suliarisariaqalissavavut, imaluunniit tamanna ingerlatiinnarniarutsigu naalagaaffiup aningaaserivissuanut akiliisalissalluta, ukiuni makkunani Nunatta Karsiani ileqqaarniarnerni akisoqisumik.
- Tassa Danmark malittarissavarput apeqqutaatinnagu taakkua koruuni ingerlatiinnarniarneraat euroluunniit atuutilersinniarneraat, aningaasaqarnermut naalakkersuisoq Palle Christiansen oqarpoq.
Danmarkilli koruuni euromik aatsaat taarsersinnaavaa amerlanerussuteqartut danskit EU-mut nangaassutinik taaneqartartut sisamaasut ilaat ataaseq atorunnaarsinniarlugu angerpata.