Danskit amerikamiullu atsioqatigiipput
Danskit amerikamiullu illersornissamut ministerii Søren Gade aamma Donald Rumsfeldt Pentagon-imi ippassaq ataatsimeeqatigiipput.
USA-ip missilinut illersuusiornissaanut atatillugu teknikkikkut, danskit amerikamiullu suleqatigiinerunissaannik isumaqatigiissut Gadep Rumsfeldtillu ataatsimeeqatigiinerminni atsiorpaat.
Danskit missilinik sakkussiornermut taamalillutik suleqataasinnaalarnerat Søren Gadep nuannaarutiginerarpaa.
Pituffimmi amerikamiut sakkutooqarfeqarnerannut atatsumik siorna isumaqatigiissuteqarneq pissutaalluni Amerikamiut danskillu taama suleqatigiilersut Søren Gadep nassuerutigaa.
Taamaattorli erseqqissaavoq, suleqatigiinnissamik massakkut isumaqatigiinneq nunatsinni Namminersornerullutik Oqartussanit paaseqateqaqqaarluni piviusunngortinneqartoq.
Nunarput sinnerlugu folketingimi ilaasortap aappaa Inuit Ataqatigiinneersoq Kuupik Kleist aviisimi Informationemi ippassaq oqarpoq, amerikamiunik taama suleqateqalernermit danskit kisimik iluanaartunngornissaat, nunattalu ajornartorsiutinik qimatsivigineqaqqinnissaa ernummatigigini.
- Nunatsinnut iluamik kinguneqanngippat iluanngilaq, danskit kisimik iluanaaruteqarniarpata, sakkutooqarfimmi uagut nunatsinniippoq. Kuupik Kleist ippassaq taama erseqqissaateqarpoq.
Siumut sinnerlugu Inatsisartuni ilaasortaq Jørgen Wæver Johansen isumaqarpoq, Danskit qanoq annertutigisumik iluanaaruteqarnissaat pillugu nassuiaateqarnissamut piffissanngortoq, iluanaarutaasinnaasut nunatta Danskillu akornanni agguaalluarneqarnissaat siunertaqaralugu. Tamannalu pillugu Jørgen Wæver Johansen-ip naalakkersuisuungallartut siulittaasuat Hans Enoksen inappaa ministeriunermut saaffiginneqqullugu iluanaarutissanik qanoq agguaasseqatigiinnissap oqaloqatigiissutigineqarnissaanik siunertalimmik.
- Assortuussutissaqanngilagut, nunarpummi taama iluanaaruteqarnissamut atorneqarpoq, Jørgen Wæver Johansen oqarpoq.
