Danskit ajutoorajunnerupput
Danskit uuliasiorfiini sulineq allamiut uuliasiorfiini sulinermiit ulorianarneruvoq. Sulinermi ajutoortarnerit qiviaraanni tamanna takuneqarsinnaavoq.
Danmarkimi nukissiornermik nakkutilliisoqarfiup kisitsisaatai naapertorlugit Danskit Nordsømi uuliasiorfiini ajutoortarnerit tuluit norgemiullu uuliasiorfiini ajutoortarnerniit marloriaammik amerlanerupput. Nyhedsbrevet 3F-imi tamanna allaaserineqarpoq.
Nukissiornermik nakkutilliisoqarfimmi allaffiup pisortaata, Birgitta Jacobsenip kisitsisit iluarinngilai.
- Danmarkip Nordsømi uuliamik qalluinerani sillimanissap qaffasissuunissaa Imaani uuliasiornermi sillimanissaq pillugu inatsimmi anguniagaavoq, taamaammat kisitsisit takullugit iluarinanngillat. Norgemi Tuluillu Nunaanni ajutoortarnerit ikilisimasut, Danmarkimi nikeriarsimanngillat, Birgitta Jacobsen oqarpoq.
Nunarsuatsinni uuliasiortut kattuffiannit, The International Association of Oil And Gas Producers-imit paasissutissat naapertorlugit, Danskit Nordsømi uuliasiorfii allanut naleqqiullugit ajutoorfiukkajunneruinnaratik nunarsuarmili ajutoorfiukkajunnerpaat ilagigaat – tassa ukioq 2005-imi Tunesiamit 2006-imilu Venezuelamit taamaallaat ajutoorfiunnginnerusimallutik.
