Danskit aalisartui ajornartorsiorput

Nunatsinniinnaanngitsoq aalisagartassiissutit isumaqatigiinngissutaasarput. Unnuarumiit danskit aalisartui aalisakkanik suliffissuarni tunisassiarineqartartunik putooruttunik aalisarnerat unitsinneqassaaq. EU-kommissionimit nalunaarutigineqarpoq pisassiissutigineqartut 170.000 tonsiusut pisarineqareersimasut. Tamanna suliffissarpassuarnik naleqassaaq, Danmarkimi aalisartut kattuffianni siulittaasoq Flemming Christensen taama oqarpoq.

- Aalisarunnaarnissarput soorunami annilaarutigisorujussuuara. Tassami naatsorsuutigisimagaluarpara putooruttorpassuaqarmat ikinnerpaamik 300.000 tonsinik pisassinneqarnissarput, tassa naatsorsueriaaseq atortagarput malillugu.

Flemming Christensen aperineqarami aalisarneq ingerlallualeruttortoq sooq unitsinneqarnersoq akivoq, putooruttut amerlassusaat siorna ernummatigineqarsimasoq taamaattumillu pisassiissutit ikinaarlugit tunniunneqarsimasut. Maannalu paasisimagitsik aalisakkat Nordsø tamakkerlugu siaruarsimasut, taamaalillunilu pisassiissutigineqartut 170.000 tonsiusut tamakkerlugit pisarineqareersimallutik. Tassa aalisagartassiissutit ikinaarujussuarlugit aalajangersarneqarsimapput, Flemming Christensen oqarpoq.