Danskip aqqartartuliortartup eqqartuussaanera aallartittoq
Umiarsuarnik aqqartartunik sanasartoq Peter Madsenip tusagassiortumik sverigemiumik Kim Wahlimik toqutsisimasutut timaanillu agguisimasutut pasineqarnera pillugu eqqartuussivimmi suliaq nunani tamalaani allaaserineqarpoq.
Allattoq Karsten Sommer
Nutserisoq Ivik Kristiansen
Eqqartuussivimmi suliaq ullaaq aallartippoq, tusagassiortullu nunanit 15-ineersut 125-t tikeralereerput. Taamaalillunilu tusagassiuutineersut Københavnip eqqartuussiviata saavani amerlasoorujussuusut DR-ip oqaluttuaraa.
Kinami, Israelimi, Tysklandimi Skandinaviamilu nunani tusagassiortut eqqartuussivimmit nunaminni TV-qarfiinut toqqaannartumik aallakaatitsisarput.
Eqqartuussivimmi suliap apriilip ulluisa 25-ata tungaanut ingerlanneqarnissaa pilersaarutaavoq.