Danskerpassuit Libanonimit qimarngutsinneqarput

Timmisartoq aqqutigalugu danskinik Damaskusimiit qimarngutsitsineq ingerlanneqarpoq, maannakkullu danskit 1050-it Danmarkiliartut aallartinneqareersimapput.

Ualip ingerlanerani allat 1100-ut timmisartunik aallartinneqarnissaat aamma naatsorsuutigineqarpoq. Taakkua saniatigut, danskit 500-t Grækenlandimiut umiarsuaat aqqutigalugu Beirut-imiit aallartinneqassapput, taama danskit nunanut allanut ministeeriaqarfiat nalunaarpoq. Grækenlandimiut umiarsuaat 850-inik ilaasoqarsinnaavoq, nunallu avannarliit innuttaasui umiarsuarmut tassunga ilaatinneqassapput.

Maannakkorpiaq Libanon-imi illoqarfimmi Sidon-imi danskit 300-t qimaanissaminnut utaqqipput, maannakkorpiarlu illoqarfik taanna najussallugu ulorianarnerpaajusoq Ritzau allappoq.

Danskit innuttaasuattut allagartallit maannakkorpiaq qasserpiaat Libanon-imiinnersut iluamik ilisimaneqanngilaq. Uppernarsaatissaqarpianngitsumik ilaatigut oqaluttoqarpoq, danskisut innuttaasuusut 10.000-it maannakkorpiaq Libanon-imiittut.