Danskeq Kinami maqaasineqarpoq

Danskeq alla, nunap sajunnerata aallartiffiata eqqaaniittoq, periarfeerunneqaraluartoq nassaarineqarpoq.

-Angut timimigut ajoqusersimanngikkaluarluni misigisaqapilussimanera malunnarpoq, danskit aallartitaat, Jeppe Tranholm-Mikkelsen, Beijingimiit nalunaarpoq. Angut danskit Chongqingimi konsuuliannit, Hans Halskovimit, ikiorserneqassaaq, konsuulillu maanna ornippaa, Jeppe Tranholm-Mikkelsen nutaarsiassaqartitsivimmut Ritzauimut oqarpoq.

Angut tammaaneqartoq takornarniaavoq, Kinamilu oqartussaasunit maanna ujaarineqarpoq.

Nunap ataasinngormat Piinsip Aappaanni sajorujussuarnerani ajunaartut maannamut 13.000-it missaanniissangatinneqarput, Kinamili tusagassiorfiit nalunaarutigaat illoqarfimmi Sichuaniinnarmi 19.000-t, allallu tusindtilippassuit illoqarfinni allani, maqaasineqartut. Nunaqarfiit avalliunerusut oqartussaasunit suli attavigineqanngillat. Ikiuiniaqatigiiffimmit Røde Korsimit oqaatigineqarpoq, illoqarfippassuit annaassiniartunit suli attavigineqarsimanngitsut, taavalu nakorsaatit toqqillu assut amigaatigineqartut.

Kinami oqartussaasut aallaqqaammut oqaraluarput ikiuiniartussanik nunanit allaneersunit pissarsiornissaq siusippallaartoq, maannali nunanit tamalaanit ikiorserneqarnissartik kimigiisissutigaat.

Kina sakkutuunik 20.000-nik ajunaarnersuaqarfimmukartitsereerpoq, Illersornissamullu ministereqarfik sakkutuunik 30.000-nik aamma aallartitsiniarpoq.