Danske Bankip Grønlandsbankimi piginneqataassutini tunivai
Grønlandsbankip piginneqataassummik annerit ilaat annaavaa. Danske Bank Grønlandsbankimi piginneqataassutsinik 36,5 procentinik pigisaqartup pappiaraatini piginneqataalersunut allanut pingasunut agguarlugit tunimmagit. Grønlandsbankimillu Piginneqataalerput Danske Andelskassers Bank, SparInvest aamma Savalimmiuni sillimmasiisarfiit ilaat Tryggingarfelagid.
Ukiup affaa qaangiupporli Grønlandsbanki Vestjysk Bankilu kattunnialermata, ilisimaneqartutullu tamanna iluatsinngitsoorpoq, naak Danske Bankip tamanna ilungersuutigisimagaluagigaa. Iluatsinngitsoormat Danske Bankimi pisortap tulliata Jakob Brogaardip, Grønlandsbankimilu siulersuisuni siulittaasuusup oqaatigaa piginneqataanermut pappiaraatitik tuninialersaaritik.
-Aningaaseriviup siunissaa eqqarsaatigalugu piginneqataasut akunnerminni iliuuserisaat qiimananngivikkami. Taamaammat piginneqataassutsigut tuniniarpavut, Grønlandsbankilu siunissami iluatsitsinissaanik kissaallugu, Jakob Brogaard oqarpoq.
Grønlandsbankimili siulersuisuni siulittaasuunerminik tunuassanerluni, aappaguluunniit apriilimi ataatsimeersuarnissaq utaqqissanerlugu suli aalajangersimannginnerarpoq.