Danske Bankip 2007-mili Royal Greenland suleqatigiunnaarpaa
2007-imi upernaagaa, Danske Bankip ulluinnarni aqutsisuisa Royal Greenlandip politikkikkut akuliuffigineqarnera qatsulluinnarlugu suleqataajumajunnaarnertik nalunaarutigaat. Aningaaseriviup karsini matuaa ingerlatseqatigiiffiullu aningaasat atugai piaartumik taarserneqassasut piumasaralugu, taama aviisi Berlingske Business allaaserinnippoq.
Danske Bankip Royal Greenlandip aqutsisui tatigiunnaarlugit taamani nalunaarpoq. Pissutigaat Naalakkersuisut Siumukkunnit siuttullit pisortamik Keld Askærimik aamma pisortap tullianik Henrik Lethimik tunuartitsinerat.
Pisortaqatigiit taaneqartut Royal Greenlandip ingerlanneqarneranik ilorraap tungaanut Danske Bankip saatitsisuusutut isigisami tunuartinneqarnerat sumik tunngaveqarnersoq bankimut nassuiaatigineqarsimanngilaq, taamaammat Danske Bankip taamani aalajangerpaa atukkat hundrede millioni koruunit arlallit piaartumik taarsersorneqalissasut Royal Greenlandimillu suleqateqarnini allat tamarmik aamma taamaatikkiartuaarneqassasut. Keld Askærip pisortatut tunuarnera Naalakkersuisunik suleqateqarsinnaannginnermik pissuteqartoq, Berlingske Businessip pisortaasimasumit namminermit tusarpaa.
- Ukiuni sisamani sinneqartoortitsisimavugut, allaat ukiuni marlussunni 140 millioni koruuninik sinneqartoortillugu. Taamaammat aamma Siulersuisut pisortaqatigiillu kissaatigisimagaluarparput Royal Greenlandimik piginnittut, aalisakkanik tunisassiornermik ilisimasalinnik privatinik ilaneqarnissaat, taamaalilluni aningaasarsiorneq aalaakkaasoq anguneqarsinnaassammat. Kisianni tamanna Naalakkersuisut kissaatigisimanngilaat. Taamaammanuna soraartariaqarsimasunga, uagut piginnittut isumaqatiginnginnatsigit, Keld Askær oqarpoq.
Keld Askærip soraarnerata kingorna Flemming Knudsen, Air Greenlandimi pisortaasimasoq Royal Greenlandimi pisortanngorpoq. Royal Greenland maannakkorpiaq 2,3 milliardi koruuninik taarsigassarsiaqarpoq. Berlingske Business-imi allaaserisaq naapertorlugu aningaasat ilaat Tysklandimi, Sverigemi Tuluillu Nunaanni aningaaserivinniit attartugaapput, ilai Amerikami soraarnerussutisiaqalernissamut aningaasaateqarfinnit attartugaralugit.
