Pituffimmi sullissisussaajunnaarami ilungersulerpoq
Sanaartugassanik suliassinneqartartoq, MT Højgaard pilersaarusianik kinguartinneqartunik kalaallillu aporfiliinerannik eqqugaaqqasoq ingerlanerliorpoq. Suliffeqarfissuup 2016-imut nalunaarutini sisamanngornermi saqqummersippaa kisitsisillu tupaallaatigisassaanngillat.
Ukioq naatsorsuutigisattut ingerlasimanngilaq tamannalu ilorrisimaarnanngitsoq, suliffeqarfissuarmi pisortaq, Torben Biilmann oqarpoq.
- Ineriartorluarnermut 2016-imi ingerlatiinnarnissaa naatsorsuutigisimagaluarparput qanorli ilungersunartigissanera minnerusutut takorloorsimavarput, ukiumut naatsorsuutini allappoq nangillunilu:
- Ukiup aallartinnerani inernissatut naatsorsuutigisagut eqqortinneqanngillat taakkulu sutigulluunniit ilorrisimaarnanngillat.
Greenland Contractorsip Pituffimmi ingerlatsineq tigummisaraa. MT Højgaardip suliffeqarfiup 66 procentia pigaa, 33 procentialu Greenland Holding A/S-imik pigineqarluni.
Pilersaarutit kinguartinneqarnerinik pilersaarutillu atorunnaarsinneqarnerannik ukioq ilaqarsimasoq, Torben Biilmannip erseqqissarpaa.
MT Højgaard taakku saniatigut Pituffimmi sakkutooqarfimmut isumaqatigiissutinut tunngatillugu aningaasartuuteqanngaatsiarsimavoq. Suliffeqarfik isumaqatigiissuteqarfigineqarsimasoq kaaviiaartitaminik 300 millionit koruuninik annaasaqarpoq.
Isumaqatigiissut amerikamiut naalakkersuisuilu 2015-imi isumaqatigiinniutigineqaqqippoq. USA-p sakkutuuisa suliffeqarfik alla toqqarmassuk MT Højgaardip isumaqatigiissut annaangajappaat.
Politikkikkut annertuumik assortuunnertalimmik isumaqatigiinniartoqareersoq MT Højgaardip isumaqatigiissut tigummiinnarpaa taamaakkaluartorli allaanertut tigummilerlugu. Suliffeqarfik maanna utaqqiisaarummik 2017-ip naanissaanut isumaqatigiissuteqarfigineqarpoq
Suliffeqarfissuup MT Højgaardip ingerlatsinermi aningaasaataasa 73 millionit koruuninik 2016-imi apparneranik tamanna kinguneqarpoq. Ukiup siuliani ingerlanermi aningaasartuutit 372 millionit koruuninik iluanaaruteqarfiuvoq.
/ritzau/
