Dansk Folkepartiimeersoq attaviitsunngorpoq

Ministeriunerup Lars Løkke Rasmussenip naalakkersuisui 90-inik siunissami tunuliaqutaqassappata, Christian H. Hansen, Savalimmiormiu Edmund Joensen, attaviitsoq Pia Christmas-Møller imaluunniit Liberal Alliance taamaalillutik apeqqutaalerput.

Christian H. Hansen nammineq nassuiaavoq, politikkikkut akaareqatigiinnginneq pissutigalugu Dansk Folkepartiimit tunuarluni.

- Immitsinnut inuulluaqqugutta illuatungeriinnut pitsaanerpaavoq. Silap pissusaata allanngoriartornera avatangiisillu pillugit ataatsimeersuartoqarnerani, Dansk Folkeparti ilumoorussinngippallaaqaaq, Christian H. Hansen oqarpoq, nangillunilu:

- Suliffissaqanngitsut amerliartuinnarnerat napparsimmavinnilu sulisunik soraarsitsiortorneq inuiaqatigiinni ajornartorsiutitut angisuutut isigaakka. Partiima suut pingaartinneruai - timimut kiinnamullu assiaqutit, burka-t? Tamanna uanga akuersaarsinnaanngilara, Christian H. Hansen oqarpoq. Taanna sivisuumik napparsimareerluni Folketingimut februaarip aallaqaataani utissaaq.

Christian H. Hansenip tunuarnera Dansk Folkepartimit uggorineqarpoq.

- Tunuarnera eqqumiigalugulu uggoraarput. Ilimagisimagaluarparput peqqissiguni Dansk Folkepartimut uteqqissasoq, Dansk Folkepartip folketingimut ilaasortaatitaasa siulittaasuat, Kristian Thulesen Dahl, tusagassiuutinut allappoq.

Christian H. Hansenili nutaarsiassaqartitsivimmit Ritzauimit oqarsimanerarneqarpoq, partiit naalakkersuisuutitaqartut Venstret aamma Konservativit tapersersortuassallugit.