Dansk Folkepartii pissutsinik ilisimasaqanngitsutut oqaluttoq Hans E.-p oqaatigaa
Danmarkimi Dansk Folkepartiip nunatta namminersulernissaata ukiunik 50-inik kinguartinneqartariaqarnera pillugu siunnersuutaa Folketingimi ullumi oqaluuserineqassaaq. Nunatsinni naalakkersuisut siulittaasuat Hans Enoksen isumaqarpoq, taakku uniffiginagit nunarput ingerlaannassasoq.
- Isumaqarpunga taamatut oqariartuuteqarneq pissutsinik ilisimasaqannginnermik tunngaveqartoq. Kalaallit inuiaat qangaaniilli namminneerlutik ukiuni 1000-linni nunartik namminneerlutik ingerlannikuuaat, kisianni nunasiaanerup kingorna oqartussaaffiit allallu tamarmik annaajortorneqarsimallutik, massakkut anersaaq nammineerusunneq massakkut kalaallini pigineqartoq, isumaqarpunga kinguarsarneqarani anguniarneqartariaqartoq aamma anguneqassaaq, Hans Enoksen oqarpoq, nangipporlu:
- Isumaqarpunga inuiaat nammineerusuttut inuiattut atugartuutut imminnut isigisuninngaanniit unitsinniarneqassanngitsoq aamma piumassuseqarput innuttaasut nammineernissaminnut aamma Savalimmiormiut taama kissaateqarpata soorunami uagut ataqqillugulu tapersersussavarput, neriuppunga aamma danskit paasinnillutik nammineerusunnerput annertuumik tapersersussagaat, tassami ineriartorniarlutaana nammineerniarsarisugut, allanillu isumagineqaannaarneq qimakkusulerparput nammineersinnaalluta nalunngilarput aamma piumassuseqarpugut nunarput nammineerluta ingerlatissallugu, Hans Enoksen oqarpoq.
Hans Enoksen aperaarput, Danmarkimi Dansk Folkepartiikkutut eqqarsartut qanoq ilillugit killinniarneqarsinnaanersut.
- Isumaqarpunga taamatut eqqarsartut uniffiginagit sulinerput ingerlatissagipput, aamma danskit imminnut atugartuutut siuarsimanerpaatullu imminnut isigisut pisussaaffigaat inuiaat nammineerusuttut annertuumik tapersersussallugit.
- Illit nammineq isummat malillugu namminersulernissatta tungaanut ukiut qassiussappat?
- Soorunami danskit naalagaaffiat peqatigalugu paaseqatigalugu namminersornissaq eqqutissavarput, kisianni ukiut 50-t uanga takorluunngilluinnarpakka siuisinnerungaartumik tamanna naammassineqartariaqarpoq, Hans Enoksen oqarpoq.
