Dansk Folkeparti sorsuuteqaqqilerpoq

Dansk Folkeparti Namminersorneq pillugu inatsisissamut kisiartaalluni isumaqataasimanngilaq, maannalu kingumut Kalaallit Nunaannut tunngassuteqartumik sorsuuteqaqqilerpoq. Tamatumuunalu klima pillugu isumaqatigiissummut atatsillugu Kalaallit Nunaata akiliuteqartalernissaa anguniagaralugu.

Namminersorneq pillugu isumaqatigiissuumi Kalaallit Nunaanni nunap pigisaanik aatsitassat assigisaallu Kalaallit Nunaata iluanaarutigissagai akisussaaffigigaalu aaliangersarneqarnikuuvoq.

- Mamianaqaaq Kalaallit Nunaata namminersornissaa pillugu isumaqatigiissusiortoqarnikuunera. Folketingimi sianiinaagaavoq. Danmarkimmi suna tamaat Kalaallit Nunaanni nunamut attuumassuteqartoq Kalaallinut tunniunnikuuaa, Søren Espersen Danske folkepartimeersoq  aviisimut saqqummersartumut Berlingske Tidendemut taama oqarpoq. Taassumalu statsministeri folketingemi ataatsimiinnermi apeqquteqarfiginiarpaa.

Siusinnerusukkulli nunanut allanut ministeriusimasoq Per stig Møller (K), Søren Espersenimut isumaqataanngilaq. Taannami isumaqarpoq isumaqatigiissutaasut malinneqartariaqartut. Taamaakkaluartorli Kalaallit Nunaat aatsitassanit aningaasarpassuarnik isaatitileraluarpat aningaasat qanoq pineqarnissaat pillugu oqaaseqarusunngilaq.

-Pingaaruteqarpoq Kalaallit Nunaata periarfissariligaasa tapersersorneqarnissaat, periarfissallu Kalaallit Nunaanninnganniit arsaarinnissutigineqannginnissaat. Aningaasartuuteqaruttalu Kalaallit Nunaannut aamma iluaqutaasinnaasumik, aamma ajunngilaq, naalagaaffeqatigiippugummi. Taamaattumillu aaqqiiniaasoqartariaqarpoq nalagaaffeqatigiinnut tamanut pitsaasumik. Taamaattoqanngippammi naalagaaffeqatigiinnerup inissisimanera allanngorsinnaavoq, tamannalumi Kalaallit Nunaannit Danamarkiminngaanniillu angorusunneqarnavianngilaq, Per Stig Møller oqarpoq.

Per Stig Møllerilli aningaasat pillugit oqaaseqarusunnginnera ministeriunermini suleqatigisimasaata Birthe Rønn Hornbechip paasiuminaatsippaa.

-Isumaqatigiissutigineqartut ersarilluinnarput. Isumaqatigiissutimmi malinneqanngippata taava neriorsuutinik unioqqutitsissaagut. Per Stig Møllerip aningaasat pillugit oqaaseqarusunnginnera paasisinnaangilara. Isumaqatiigiissuteqarnermi Kalaallit Nunaat iluanaarutissanik tunineqarpoq, neriuinnarpungalu  Kalaallit Nunaat milliartikkaanik isaatitsileruni oqartussaaffiit amerlanerusut nammineerluni tigujumaarai, Birthe Rønn Hornbech (V) taama oqarpoq.

Kalaallit Nunaata namminersulerneranut isumaqatigiissutip imarisaa atuutiinnassasoq SF-minngaanniit aamma siunertarineqarpoq.

- Inatsisissamik isumaqatiginnninniarnermi suna tamaat tikillugu isumaqatiginniartoqarsimavoq. Tamannalu allanngortinneqartariaqanngilaq. Aamma Kalaallit Nunaat aningaasanik amerlasuunik isaatitsileraluarpalluunniit tamanna atuutiinnassaaq,Anne Båstrup SF-miit Kalaallit oqaaseqartartuat taama oqarpoq.

Søren Espersnilli oqariartuutigisaa Per Stig Møllerillu aningaasat kikkunnik iluanaarutissanerini pillugit oqaaseqarusunnginnera aamma Enhedlistiminngaanniit isumaqatiginartinneqanngilaq.

- Tupigusuutiginngilara Søren Espersenip maanna taama iliuuseqarnera. Namminersornermi pillugu isumaqatigiisitamik suliaqarnitsinnili partiiata tamanna aamma oqariartuutigereerpaa. Isumaqarpungalu maanna Per stig Møllerip aningaasat isaatinneqartussat pillugit isumamminik allanngortitseqqajaanera nuannersuunngitsoq. Tamannami Kalaallit Nunaata Danmarkillu akornanni ataqatigiinnermik allanngortitsisinnaavoq. Isumaqarpungalu statsministerip inatsimmik pilersitsisoqarnerani partiit tamarmik, DF kisimi pinnani akuersisimasunut isiginiartariaqartoq, inatsimmillu llanngortitsisoqassanngitsoq, Enhedslistemiit Finn Sørensen oqarpoq.