Dansk Folkeparti qinersinermi ajugaarujussuarpoq
EU-mut qinersisarnerni Dansk Folkparti, Danmarkimi partiit annersarilerpaat aatsaallu taama qinerneqartigaluni tassa qinersisartunit procentinngorlugu 26,7-inik qinerneqaramik.
Partiinit EU-mik nuannarisaqarnerpaat, Venstret qinersinermi ajorsarujussuarput, taakku pingasunik ilaasortaatitaqarsimagaluartut maanna marluinnarnik ilaasortaateqaleramik.
Venstrep ajorsarujussuarneranut akisussaasuunerarluni, Venstre-p siulittaasuata ministeriusimasup, Lars Løkke Rasmussen-ip ippassaq unnukkut oqaatigaa.
- Qinersinermi uani pissarsiassatut anguniakkavut angunngitsoorpagut, tamannalu uanga akisussaaffigaara. Venstre-p politikkiata siaruarterneqarnissaannut taarsiullugu, piffissami kingullermi uannut tunngasut tusagassiutitigut eqqartorneqaqaat. Tamanna Venstre-p qinerneqanngippallaarneranut pissutaasinnaalluarpoq, tamannalu uanga akisussaaffigalugu tigussavara.
Lars Løkke Rasmussen oqarpoq.
De Radikale-t EU-p Inatsisartuinut ataatsimik ilaasortaatitaqalersut, EU-mut akerliusut Folkebevægelsen mod EU aamma ataatsimik isertitsipput, taamatullu De konservative aamma SF-it tamarmik ataatsimik aamma ilaasortaatitaqalerlutik.
Socialdemokraatilli sisamanik ilaasortaatitaqarsimasut maanna pingasuinnarnik ilaasortaatitaqalerput.
Danmarkimi qinersisinnaasut 56,3 procentii ippassaq qinersiartorsimapput, kingullermik qinersisoqarneranut, tassa 2009-mi pisumut naleqqiullugu appasinnerulaarluni.
EU-p Inatsisartuinut danskit qinersineri arfineq pingajussaa ukioq manna pisoq aamma EU-mi innuttaasut nutaanik atortussanik nassaarnerminni kisermaassisussaatitaanerisa illersorneqarnissaannut eqqartuussivimmik pilersitsisoqarnissaanik taasitinneqarput, tamannalu taasiartortunit 60,2 procentinit illersorneqarluni atuuttussanngortinneqarpoq.
Partiit saamerlerpaaniittut talerperlerpaaniittullu EU-p inatsisartuinut qinersinermi ajugaappata, tamanna Kalaallit Nunaannut akornutaasinnaasoq, Naalakkersuisut nunanut allanut tunngasunut pisortaqarfianni pisortap Kai Holst Andersenip qinersisoqannginnerani oqaatigaa.
EU-p patentdomstolia pillugu, tassa nioqqutit illersorneqarneranni eqqartuussivik pillugu Danmarkimi innuttaasut aamma taasitinneqarput, amerlanerussuteqarluartullu taassuminnga akuersipput.
Taasiartortut 60,45 procentii akuersipput, 36,19 procentit akuersinngitsut.
Qinersinermi kisitsisit:
Dansk Folkeparti: Sisamanik qinigaatitaqarpoq, 26,6 procentit
Socialdemokratit: Pingasunik qinigaatitaqarput, 19,1 procentit
Venstre: Marlunnik qinigaatitaqarpoq, 16,7 procentit
SF: Ataatsimik qinigaatitaqarpoq, 10,9 procentit
Konservatiivit: Ataatsimik qinigaatitaqarput, 9,2 procentit
Folkebevægelsen mod EU: Ataatsimik qinigaatitaqarput, 8,1 procentit
Radikale Venstre: Ataatsimik qinigaatitaqarput, 6,5 procentit
Liberal Alliance: Qinigaatitaqanngitsoorput, 2,9 procentit