Dansk Folkeparti nukingisaarivoq

Kalaallit Nunaanni inoqatinik immikkoortitsisarnerup pinerlunnertut isigineqarnissaanik inatsisissap atuutilersinneqarnissaanut atatillugu, Dansk Folkeparti maanna nukingisaaraluni tutsiuppoq.
Allattoq Elisa Isaksen
juulip 28-at 2008 06:38

Taama aviisimut Politikenimut ippassaq oqarpoq Dansk Folkepartiimi naligiissitaanissaq pillugu oqaaseqartartoq Marlene Harpsøe.

Taassuma taama qisuariarneranut tunngaviuvoq aviisimi allaaserineqaqqammermat anguteqatiminnik arnaqatiminnillu atoqateqartartut Kalaallit Nunaanni immikkoortinneqartarsimasut.

Inoqatinik immikkoortitsisarneq pillugu inatsit pillarneqaataasinnaasutut inatsisitut Kalaallit Nunaanni nutaajussaaq. Inatsillu taanna Folketingimi akuersissutigineqareerpoq aatsaalli 2010-mi januaarip aallaqqaataani atuutilersinneqartussaalluni.

- Inatsimmi tassani paragraf 100 nukingisaarutigaara, taamaalilluni Kalaallit Nunaanni kinguaassiutitigut atoqateqartarneq tunngavigiinnarlugu immikkoortitsisarneq piaarnerpaamik pillarneqaataasalerniassammat, aviisimut Politikenimut ilaatigut taama oqarpoq Marlene Harpsøe.

Taassuma aamma Inatsisinik atortitsinermut ministeri Lene Espersen qinnuigaa Politikenip allaaserisaa tamanna oqaaseqarfigisariaqaraa, taamatuttaaq inatsisip pineqartup piaarnerusumik atuutilersinneqarnissaa qanoq isumaqarfigineraa apeqqutigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq