Dansk Folkeparti "Kalaallit Nunaat akiliinerusariaqarpoq"
- Sunniuteqaqataasinnaaneq pisinnaanngorpoq, akiliutigineqartartussalli isumaqatigiissutaanngillat, Thuesen Dahl Klima pillugu isumaqatigiissut Nuummi pingasunngormat atsiorneqartoq pillugu taama oqarpoq.
Danmarkip Kalaallit Nunaat siunissami klima pillugu isumaqatigiinniarnerni peqataasinnaanngorlugu periarfissippaa. Kristian Thule Dahlillu tamanna Danmarkimut akisunaarneqassanngitsoq qulakkeerusuppaa, taamaattumillu isumaqarpoq Kalaallit Nunaat Danmarkimut akiliuteqarnerusariaqartoq.
Tamannalu pillugu Statsministerimut allakkatigut marlussunnik apeqquteqarpoq, kingornalu statministeri isumasioqatigiinnissamut qaaqquniarlugu.
Allakkatsigut apeqquteqarnermini siullertut apeqqutigaa Kalaallit Nunaata nunat tamalaat akornanni klima pillugu isumaqatiginninniarnernut peqataasinnaanngornera qanoq Kalaallit Nunaannut akileeraarutaassanersoq?
Aappaattullu apeqqutigaa Statsministerip isumaqatigineraa Kalaallit Nunaata akisussaaffimmik tigusinermini akileeqataasarnissaa, tamannalu pisinnaasoq Danmarkip Kalaallit Nunaanut akiliutaasa annikilliiviginerisigut.
Folketingimi ilaasortaq Venstremeersoq, Birthe Rønn Hornbech, nunatsinnut tunngasunik ilisimasaqarluartoq, nunatsinnilu namminersulernissamut inatsiseqalernissamut suleqataalluartut ilaat, Dansk Folkepartimi ilaasortap Thulesen-Dahlsip oqaasiinut tupigusuppallaanngilaq.
- Tupiginngeqaara Thulesen-Dahl sassartaarluni taama oqaaseqarmat, Dansk Folkepartimi namminersulernissamut inatsisiliortoqartussanngormat akerliuvoq. Venstremi isumaqarpugut namminersulernissamut atatillugu isumaqatiissutaasimasut naapertorlugit atuutsinneqartariaqartut. Taamaappatalu tamanna iluarisimaassavarput, Birthe Hornbech knr.gl-mut oqarpoq.
