Dansk Folkeparti atsioqataarusunngilaq
Namminersorneq pillugu inatsit ullumi atsiorneqarmat Dansk Folkeparti atsioqataarusunngilaq. Inatsit Folketingimi decembarimiussagunartoq taasissutigineqassaaq.
Allattoq Louise M. Kleemann
apriilip 17-at 2008 09:29
-Dansk Folkeparti isumaqatigiissutip avataaniippoq, ilisimatitsissutigaalu akerliulluni taasiniarluni, Namminersorneq pillugu Isumalioqatigiissitami ilaasortaq, Søren Espersen, oqarpoq.
Kalaallit Nunaata pisuussutaanut pisinnaatitaaffiit inatsimmi ilaapput, tassalu taannartaa Dansk Folkepartip isumatsannartoqartutut taavaa.
Pisuussutit Kalaalit Nunaata isumaqatigiissut malillugu oqartussaaffigisussaavai. Taamaakkaluartoq isertitat 75 millioni koruuninit amerlanerit Danmarkip Kalaallit Nunaatalu aveqatigiittussaavaat.
-Ministeriunerusimasup Poul Schüterip danskit naalagaaffiata annersaa ministeriunerunermi nalaani allanut tunniunnikuuvaa, kukkunerlu taanna maanna ministeriunerup, Anders Fogh Rasmussenip, uteqqippaa, Søren Espersen oqarpoq.
