Dansk Folkeparti: Arraa uagunuku aningaasaativut

Kusanaatsualiat kingulliit, pingaartumillu Carsten Frank Hansenip atorfinitsinneqarnerata kingorna, Kalaallit Nunaanni qanoq ingerlatsisoqarnerata pitsaanerusumik nakkutigineqarnissaa Dansk Folkepartiip kissaatigaa. Berlingske ullaaq manna taama allaaserisaqarpoq.
oktobarip 07-at 2013 05:50

- 2009-mit ukiut tamaasa Kalaallit Nunaannut 3,5 mia. koruunit ataatsimoortumik tapiissutigineqartarnissaat Namminersorneq pillugu inatsisikkut tunngavilernikuaarput. Aningaasat taakku qanoq atorneqarneri ilisimaqqissaartariaqarparput. Kalaallit Nunaammi kunngeqarfiup ilagivaa. Ataatsimoortumik tapiissutit tunniunneqartartut Naalagaaffiup kukkunersiuisuanit kukkunersiorneqartarnissaat Danmarkip akerlilerneqarsinnaanngitsumik piumasaqaatigisariaqarpaa, Søren Espersen (DF), Folketingip Kalaallit Nunaat pillugu ataatsimiititaliaani ilaasortaq Berlingskemut oqarpoq.

Søren Espersenip atorfinitsitsinerit soraarsitsinerillu assortuussutaaqisut innersuussutigalugit ima oqarpoq.

- Allaaserisat saqqummiussasi atuarlugit tupinnaqaat. Bananrepublikkiniinnaq taamaaliortoqartarpoq.

Søren Espersen Dansk Folkepartiilu Kalaallit Nunaanni pissutsinut akulerunnissamik piumasaqartut kisiartaraat, Dansk Folkepartiimeersullu oqaatigaa tamatumunnga pissutaasoq erseqqilluinnartoq.

- Kalaallit Nunaannut tunngasut Folketingimi attorneqarusunngillat. Danskimmi politikerii nunasiaatilissuartut isigineqarnissartik annilaangatigisupilussuuaat. Taamaammat matumani kisimiilluinnarpugut. Taamatut oqaaseqarama, akulikitsumillumi taamaaliortarpunga, akissutigineqaannartarpoq kalaallit nammineq aalajangiiffigisassarigaat. Arraa, uagunuku aningaasaativut, Søren Espersen Berlingskemut oqarpoq.

Søren Espersenimut isumaqataanngitsut ilaat tassaavoq Konservativit Kalaallit Nunaat pillugu oqaaseqartartuat, Per Stig Møller.

- Danmarkimi oqaqqajaasoqartarpoq Kalaallit Nunaat namminersorluni oqartussaaffeqarsinnaasoq, ajornartorsiulerpallu aqutsineq uagut tiguinnarumaaripput. Kalaallit Nunaat namminersorluni oqartussaaffeqarpoq ataatsimoortumillu tapiissutit pillugit nassuiaasinneqartussaanani - taamaammat Søren Espersen isumaqatiginngilara. Naalagaaffiup ataatsimoortumik tapiissutaata qanoq atorneqarnissaat Kalaallit Nunaata nammineerluni aalajangertussaavaa, soorlu Danmarkimi kommunit tapiissutiminnut tunngatillugu taamaaliorsinnaatitaasut. Kalaallit politikeriisa  ataatsimoortumik tapiissutit ukiumoortut 3,5 mia. koruuninik aningaasartaqartut sumut atorneqarsimaneri pillugit qinersisartuminnut nassuiaateqarnissaminnut akisussaaffeqarput, Per Stig Møller oqarpoq.