Dannebrog-mi sakkutuut pinngitsaaliisimasutut pisuutitaapput

Nuup Eqqartuussivia ullumi aalajangerpoq sakkutuut imarsiortut marluk Dronningip umiarsuani Dannebrog-mi inuttat pinngitsaaliissimasutut pisuutinneqartut. Siorna Dannebrog-p Nuummiinnerani pinngitsaaliineq pisimavoq.
Allattoq Noah Mølgaard
apriilip 24-at 2012 09:31

Eqqartuussiviup aalajangernera Nuup Eqqartuussiviani ullumi ullaap tungaa qulinut nalunaarutigineqarpoq. Tassani sakkutuut imarsiortut marluk pisuutinneqarput arnamik pinngitsaaliisimasutut. Nuup Eqqartuussivia aalajangerpoq angutit taakku qaammatini 18-ni pinerluuteqarsimasunut inissiisarfimmiissasut aammalu 70.000 koruuninik taarsiissasut.

Angutit taakku pisuutinneqarput siorna juulip qaammataa Dannebrogp Nuummiinnerat nalaani arnamik pinngitsaaliisimasutut. Suliap aallartinneraniit angutit taakku pinngitsuunerartut nassuiaanerminnilu Nuup Eqqartuussiviani tamanna nalunaarutigeqqippaat.

Nuup Eqqartuussiviata arnat nassuiaataa tunngavigalugu aalajangerpoq. Angutit taakku marluk eqqartuussiviup aalajangernera nalunaarutigineqarmat najuutinngillat. Taakku illersuisuata eqqartuussiviup aalajangernera ingerlaannaq Nunatta Eqqartuussivianut ingerlateqqitassanngortippaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq