Danmarkshavniliarlutik aallareerput
Angalaneq ukiut hunnorujut matuma siornagut issittumi ilisimasassarsiortartup Mylius-Erichsenip Danmarksekspeditionimik taallugu ilisimasassarsiornera eqqaaniarlugu ingerlanneqassaaq. Ilisimasassarsiornermi matumani sinerissami kangerlunnilu misissugassanik angerlaassinikkut ilisimatusarnissaq eqqarsaataavoq.
- Angalaneq uannut misigisassarsiornerussaaq, taamaattorli angalanermi ilisimatusarnikkut pilersaarutinik pingasunik aamma ingerlatsissaagut, umiarsuup naalagaa Jonas Bergsøe Københavnip umiarsualivianit aallanngitsiarnerminni oqarpoq.
Ilisimatusarluni misissuinissat pingasut taaneqartut Danmarkshavnip tungaanut ingerlaarnermi Kong Oscars Fjordimi aamma Kejser Franz Josefs Fjordimi ingerlanneqassapput. Ilisimatusartut tamaani ukiuni kingullerni 4.500-ni silap pissusaata allanngoriartorsimanera, immap naqqani qillerinermikkut misissuiffiginiarpaat.
Ukiut hunnorujut matuma siornagut Danmarksekspeditionip Tunup Avannaata nunap assiliornissaa suliaraa, maanna umiarsuaaqqami Activ-imi ilisimatusartut nipit iluaqutsiullugit immap naqqa misissuiffigissavaat, taamaalilluni sikup ingerlaarnermini immap naqqanut sunniutai paasisaqarfigineqarsinnaaniassammata, umiarsuup naalagaa Jonas Bergsøe taama nassuiaavoq.