Danmarkshavn nalliuttorsiorpoq
Oqaluttuarisaanermi ilisimaneqarluartoq oqaluttualiatut eqqumiitsutullu eqqaamaneqartartoq, ullumi nalliuttorsiutigineqarpoq.
Ukiut 100-t matuma siorna ulloq manna ilisimasassarsiortut umiarsuaat ”Danmark” Danmarkshavnimut tulaqqaarpoq.
Issittumi ilisimasassarsiortartut ikittuinnaat akornanni danskit ilisimasassarsiortartut 1906-imiit 1908-mut ilisimasassarsiornerat nunarsuarmi ilisimaneqarlualerpoq.
Atuakkiortoq Mylius Erichsen løjtnanti Høegh Hagen kiisalu kalaaleq Jørgen Brønlund Kalaallit Nunaata avannaa nunap assiliorniarlugu ilisimasassarsiortillutik eqqumiiginarsinnaasorineqartumik oqallisaaqisumillu 1907-mi ajunaarput.
Umiarsuaq ukiuunerani Danmarkshavnimi sikkussaaqqalluni kisaqqatinneqartuareersoq, aatsaat 1908-mi Københavnimut ukiakkut utertinneqarpoq.
Danskit ilisimasassarsioraluarnerisa kingorna ukiuni 40-ni Danmarkshavni inoqajuitsutut pineqarpoq, 1948-mili aasaagaa silasiorfittut sulisoqartinneqalerpoq.
Ullumikkut Danmarkshavni DMI sinnerlugu Tele Greenlandimit ingerlanneqarpoq, taamaalillunilu nunatsinnut tunngatillugu misissuiffittut pingaarnerpaatut isigineqalerluni.
Danmarkshavni ukioq naallugu angutinik sulisoqartarpoq, ullumilu taakku nalliuttorsiornermut atatillugu silasiorfimmi aamma illorsuarmik taaneqartartumi champagne-mik skåleertinneqarput.
