Danmarkip ukiumoortumik tapiissutai atukkiussaapput
Inatsisartunut ilaasortaq IA-meersoq Josef Tuusi Motzfeldt tusagassiuutinut nalunaaruteqarpoq, tamatumuuna sammillugu, folketingimut ilaasortap Kuupik Kleistip Folketingip ammaanersiorluni oqallinnerani oqaatigimmagu, aningaasarsiornikkut professori Martin Paldam oqarsimasoq, Danmarkip nunatsinnut aningaasaliissutigisartagai, Danmarkip nunatsinnut atukkiussaatut isigisariaqartut. Atukkiussallu taakkua Martin Paldamip naatsorsuinera naapertorlugu 130 milliard koruuniupput.
Taamatut oqariartuuteqarneq Kuupik Kleistip Folketingip oqaluttarfianit tunuartippaa, oqarluni Danmarkip nunatsinni 1900-kkut aallartinneranniit aatsitassarsiornermik ingerlatsisarneri Danmarkip puigorsimagai.
Nunatsinni siusinnerusukkut aningaasaqarnermut naalakkersuisuusoq, inatsisartunut ilaasortaq Josef Motzfeldt taamatut oqariartuuteqarneq qisuariarfigalugu ilaatigut ima allappoq: ’Aningaasarsiornikkut professoriusariaqanngilaq taama torinngitsigisumik isummersorniaraanni, tassa inuiaat ukiunut 55-inut kingumoortumik 130 milliardinik akiligassaqarnerarniaraanni’.
Josef Motzfeldtip aningaasarsiornikkut professori Martin Paldam kaammattorpaa, ukiuni 55-ini taasamini Danmarkip Kalaallit Nunarput aningaasatigut qanoq iluaqutigisimaneraa takussutissioqqullugu.
