Danmarkip tapiissutai utertartut misissuiffiginiarneqarput

februaarip 25-at 2005 15:15

Enhedslisten, namminersorneq pillugu ataatsimoortumik isumalioqatigiissitani ilaasortaatitaqarlerpoq. Enhedslisten Danmarkimi partiini kisiartaalluni ataatsimiititaliarsuarmi 16-inik inuttaqartumi ilaasortaatitaqanngikkaluarpoq, ilaasortaatitaqaleramilu sulissutigisassaasa ilagaat isumalioqatigiissitap siammarnerunissaa.

Aamma bloktilskudiniit aningaasat qanoq amerlatigisut Damarkimut uteqqittarnersut misissorusunneqarpoq.

Enhedslistip ilaasortaatitaqalerneratigut saamerliit nukittunerusussanngorput. Folketingimut qinersinermi ilaasortanik marlunnik siuariaateqarmata statsminister Anders Fogh Rasmussen-ip Enhedslisten sunniuteqarnerulissasoq aaliangiussimammagu, radioaviisimit paasisagut naapertorlugit Folketingimi ilaasortaq Line Barfod, namminersorneq pillugu isumalioqatigiissitani ilaasortanngussaaq.

Isumalioqatigiissitanut suliakkiut naapertorlugu Kalaallit Nunaata namminersulivinnissaa periarfissaqanngilaq, tamannalu ingerlariaqqinnissamut aporfiuvoq, Søren Søndergaard isumaqarpoq. Taamaammat Folketingimi ilaasortaasimasoq isumaqarpoq isumalioqatigiissitat suliassaat imartunerusariaqartut.

Namminersorneq pillugu ataatsimoortumik isumalioqatigiissitami namminersulernissaq anguniarneqarpoq, massakkut inatsisit tunngaviusut allanngortinngikkaluarlugit, tamannalu ajornassangatillugu Søndergaard oqarpoq.

Aamma isumaqarnerarpoq nunatsinnut naalagaaffiup aningaasaliissutigisartagaat amerlaqisut Danmarkimut ueqqittarsimassasut, Danskit suliffeqarfii sulisullu amerlaqisut akileraarutaat utertarsimassammata. Tamannalu misissorneqartariaqarnerarlugu.

Danmarkillu naalagaaffiata aningaassaliissutigisartagaat eqqarsaatigalugit, taakua namminersulernissaq pillugu isummanik avissaartuutitsisariaqangitsut Søren Søndergaard isumaqarnerarpoq, Savalimmiunimi taamaatoqarsimammat.

Ukiut nunasiaqarfiusut qaangiutererput, taamaammat kalaallit savalimmiormiullu namminersulerniarnerat tikilluaqquneqartariaqarpoq, Søren Søndergaard oqarpoq.

Namminersorneq pillugu ataatsimoortumik isumalioqatigiissitat tulliani ataatsmiissapput marsip 15-anni Ilulissani.