Danmarkip suleqataanissaa pisariaqartinneqarpoq

Meeqqat sumiginnakkat iliuuseqarfiginiarlugit Danmarkimi kattuffissuit nunatsinni aamma suliniuteqartartut Danmarkimi qinikkanut kaammattuipput, naalagaaffiup tapiissutigisartagaasa ilaannik isumaginninnermut immikkoortitsisalernissaq piffissanngortoq.

Siumut sinnerlugit Folketingimut ilaasortaq Lars-Emil Johansen tamanna pillugu oqarpoq, kikkut tamarmik suleqataanissaat pisariaqartoq, minnerunngitsumillu immikkut suliniummik aallartitsisoqarlunilu naalagaaffimmit tapiissutaasartut saniatigut aningaasaliissuteqartoqaqqittariaqartoq.

- Sakialluut tuberkulose 1950-ikkunni nappaataaqimmat immikkut ittumik iliuuseqartoqarsimavoq, periutsip taassuma pissuseqataanik iliuuseqartoqartariaqalerpoq. Lars-Emil Johansen oqarpoq.

Aamma meeqqat angajoqqaavisa erngunnerini suminnarfissaqarnissaat, ilaqutariit højskoleni pikkorissarnissamut periarfissinneqarnissaat, imerajuttut ikiaroorajuttullu katsorsarneqarnissamut periarfissagissaarnerulernissaat piffissanngortoq isumaqarpoq. Taamatuttaaq meeqqat ilaqutariillumi atugaannik siunnersuisoqatigiinnik pilersitsisoqartariaqarnerarlugu. Naalagaaffiup tapiissutaasa amerlineqarnissaat eqqarsaatiginerlugu ?

- Tassami immikkut iliuuseqarnissaq pillugu Naalakkersuisunut saaffiginnissuteqartoqartariaqarpoq, aningaasanik immikkoortitsisoqarnissaa siunertalugu. Aamma Danmark suleqatiserineqarsinnaavoq atornerluisut ikilisarniarlugit katsorsaasussanik amerlanerusunik ilinniartitsisarnissaq pillugu. Lars-Emil Johansen nassuiaavoq.

Lars-Emil Johansen aamma erseqqissaavoq, iliuuserineqarsinnaasut pillugit siunnersuutinik Danmarkimi nunatsinnilu naalakkersuisunut qinikkatut sulinerminut atatillugu siunnersuuteqartarsinnaasassalluni.

- Isumaqarpunga suliassaq annertugaluaqaluni naammassineqarsinnaasoq. Toqqissisimaneq eqqissisimasumillu inuusaaseqarneq aqqutissiuunneqartariaqarmat. Aamma inuusuttut utoqqaallu peqatigiiffii, kattuffiit, kommunit, atuarfeqarfiit peqqinnissaqarfiillu suleqatiserineqarsinnaapput. Tamakkua kaammisarnissaannut suleqataasinnaavunga. Folketingimi ilaasortaq erseqqissaavoq.

Meeqqat sumiginnakkat pillugit maannamut misissuinerit nalunaarusiallu aallaavigalugit tamanut ammasumik Siumut Nuummi septemberimi isumasioqatigiissitsinialerpoq, iliuusaasinnaasunik nalilersuinissaq siunertaralugu. Erseqqissaatigaalli, angajoqqaat meeqqaminnik akisussaasuunerat siunissami aamma aalajangiusimaneqartariaqartoq.