Danmarkip sakkutuut 400-t angerlartinniarpai
Danskit sakkutuui Irakip kujataaniittut – 400-t missaanniittut – aammattaaq angerlarartinniarneqarput, tamannali aatsaat aggustimi pissaaq.
Danskit naalakkersuisuisa aalajangiussaminnik ullumi saqqummiussineranni tamanna oqaatigineqarpoq.
Anders Fogh Rasmussenip nunanut allanut ministeri Per Stig Møller peqatigalugu nassuiaavoq, Danmarkip sakkutooqartitsinerminut taarsiullugu Irakimiut isumannaatsuunissamik suliaqartut sungiusarneqarnissaat nukittorsarusukkaa. Aammattaaq danskit sakkutuui angerlartinneqareerpata Danmarkip qulimiguullit sisamat Irakiliartinniarpai. Qulimiguullit sulisussanik 50-it missaanniittunik ilaqartinneqassapput.
Anders Fogh Rasmussenip ippassaq Amerikamiut præsidentiat Bush aamma Irakimiut ministeriunerat Nouri al-Maliki oqaloqatigai.
Sakkutuunik Irakimiittunik angerlarartitsinissamut aalajangernermut peqatigitillugu danskit naalakkersuisui Afghanistanimut amerlanerusunik sakkutuuliiniarput.
Siornatigut danskit nunanut allanut ministeriata Niels Helveg Petersenip (R) ministeriunerup sakkutuunik angerlarartitsinissamut isummernera “quianalaartutut” taavaa.
Niels Helveg Petersenip (R) danskit naalakkersuisui namminneerlutik Irakimut politikeqarnissaat ujartorpaa.
- Isumaqarpunga Danmarkip Tuluit Nunaannik malersuerusaarnera kanngunalaartoq. Tony Blair aalajangiiniariaraangat Anders Fogh Rasmussen asserluinnaanik aalajangiisarpoq. Tamanna quiasuutissaannaavoq. Sooruna Fogh nammineerluni ersarissumik aalajangiisinnaanngitsoq, Niels Helveg Petersen nutaarsiassaqartitsivimmut Ritzauimut aperivoq.
