Danmarkip Radioani sulisut Svend Aukenip suliai kingumut qiviarpaat

Danskit politikkianni malunnaateqarnerpaat ilaat Svend Auken 66-inik ukioqarluni ullaaq toquvoq. Svend Auken 1987-imi politikkimut aatsaat pimoorullugu pulavoq, Anker Jørgensen kingoraarlugu Socialdemokratini siulittaasunngorami. Danmarkip Radioani sulisut Knud Erik Dahlip Ole Lorentzenillu Svend Aukenip politikkikkut suliai kingumut qiviarpaat.
aggustip 04-at 2009 11:39

Svend Aukenip Socialdemokratini pissaaneqarnerpaat ilaat Ritt Bjerregaard iligalugu, nammineq partiimut siulittaasuunermigut taassumalu Folketingsgruppemi siulittaasuuneratigut, Socialdemokratit nalinginnaanngitsumik patajaatsumillu aqunneqarsimapput. Aqutsisut piareersaanerisigut 1990-imi partii aatsaat taama ajugaatigaaq, taasisut 37,4 procentiullutik, Folketingimilu inissat 69-iullutik.

- Pingaaruteqarpoq aalajangiusimassallugu Socialdemokratit inissanik 15-inik pissarsimmata, pingaaruteqarpoq aalajangiusimassallugu Venstret, Konservativit Z-illu katillutik tamarmik kinguariaateqarmata.

-Isumaqatigiinniarnerit pimoorunnissaannut periarfissiissanngilatit?

-Folketingimi partiit akornanni isumaqatigiinniarnernik pimoorussanik, aap.

Svend Aukenilli siulittaasuunerata nalaa eqqumiiginaraluartumik aallartiffiullunilu uniffiuvoq. Naalakkersuisuutitaqalerfiunngitsoorpoq, eqqissiviilliornerlu annertusiartulerluni. Tamatuma peqatigisaanik Ritt Bjerregaardimik suleqateqarneq maangaannarpoq, taassuma inaa politikkikkut eqqissiviilliuutigineqalermat. Taanna gruppeformanditut ingerlaannartariaqalerpoq, qaammatillu ataatsip qaangiunneratigut Svend Auken Informationimut ima oqarpoq:

-Ritt tapersersortigilluarsimaqaara, taannalu peerummat paasinarsivoq, pisariaqartitat takorluugarisimasanninngarnit annertunerusimasut.

Taamaalilluni politikkikkut oqaluttuarisaanermi nutaanerusumi pissanganartut annerpaat ilaat 11. april 1992-imi Vejlemi pivoq.

-Inuttut nammineq anguniakkat imminullu nuannaartorineq siunissami pingaaruteqarnerulissappata, tamanna qinersisartut eqqarsaatigineqarnissaannut ersiutaavoq, taamaalillutalu equsuussalluta.

Svend Aukenip kajumissaarutaa iluaqutaanngilaq, kongressillu Poul Nyrup Rasmussen qinerpaa.

-Isumaqarpunga siunissarissaarlunga, kisianni, påskemi sulinngiffeqassagama utoqqatserpunga.

Svend Aukenimi tassa siunissarissaarpoq. Poul Nyrup Rasmussen 1993-imi ministeriuninngormat avatangiisinut tunngasunut ministerinngorpoq. Naammassisarlu tamanna ullumikkut Socialdemokratini siulittaasup Helle Thorning Schmidtip ima ersersinniarpaa:

-Taassumaana Danmark avatangiisit silallu pissusaa eqqarsaatigalugit nunatut maligassiuisunngortikkaa.

Svend Auken partiip ukiup ataatsip siornatigut ataatsimeersuarnerani inuulluaqqusivoq:

-Qaqqaqartuarpoq qaqiniagassanik allanik qooroqarlunilu qaangerniagassanik, nutaanik naammassisaqartuassalluni, pakatsisoqartuarluni, ajugaasoqartuassalluni ajorsartoqartuassallunilu. Angalaneq sivisoqaaq, angalanerli siunertaqarpoq, tamatta sorsugassaqarpugut uangalu nammineq sorsugassaqarlunga, angalaqatiginissarsili pingaaruteqaqaaq.

Socialdemokratip Frank Jensenip, sap. akunnerani kingullermi Rigshospitalimi Svend Aukenimut pulaarsimasup oqaluttuarnera naapertorlugu Auken inuiaqatigiinni sanngiinnerpaanut, suliffissaaleqisunut, soraarnerussutisiat sorsuutiginerannut kiisalu a-kasse pillugu suleriaatsimut tamarmut naammassisimasamigut eqqaamaneqarusuppoq.