Danmarkip Qalasersuaq imartaalu qulakkeerniarpaa

Qalasersuup avataaniittoq imartaq annertooq, Qallunaat Naalagaaffianut atasuussoq qulakkeerniarlugu, ilisimatuut 17-nit, qaammatini arlalinni piareersareerlutik, Svalbartimiit Qalasersuup tungaanut aallalerput.

Qalasersuaq eqqaalu tamarmi ukiuni kingullerni unnorujulikkaani soqutaavallaanngitsutut naatsorsuutigineqartarpoq.

Silap pissusaata allanngoriartornerata kinguneranik, Issittumilu sikuujuaannartup milliartornera ilutigalugu, Qalasersuup pingaaruteqarnera annertusiartorpoq.

Pisuussutit uumaatsut, soorlu uulia gassilu Issittumi ukiuni kingullerni nunarsuarmioqatitsinnit pilerigineqarneri annertusiartortillugit aamma umiarsuarmik ingerlaarfiit nutaat ujartorneqarneri annertusiartortillugit Issitttoq pingaaruteqaluarleriartorpoq.

Ilisimatuut danskiusut, umiarsuarmi sikumik aserorterummiisapput sapaatip akunnerini arfinilinni.

Uninngaarnerminnilu, immap naqqa 150.000 kvadratkilometerisut annertutigisoq mississuiffigissallugu. Misissugassaasa ilagissavaat Qalasersuup qiterpiaa. Tassani paasiniassallugu ilumut Nunarput immap naqqatigut toqqaannartumik Qalasersuarmut atanersoq. Taamaattoqarpammi Qalasersuaq Danmarkip naalagaaffianut atasoq tassa uppernarsineqassammat.

Immap naqqa Kalaallit Nunaannut toqqaannartumik attaveqartoq paasineqarpat, Danmarkip Nunattalu naalakkersuisuisa, ukioq 2014-mi Naalagaaffiit Peqatigiinnut qinnuteqaat nassiutissavaat Qalasersuaq Nunatta Danmarkillu akisussaaffigissagaat.

Russit ilisimatuuisa aamma paasiniarpaat Qalasersuaq Ruslandimut atanersoq. Russit aqqartartuata erfalasoq immap naqqanut ikkuppaat ukioq 2007-mili, tassalu taamanili paasinarsivoq russit Qalasersuarmut soqutiginninnerat annertuupilussuusoq.