Danmarkip pigisaanik saassussiniarlutik nalunaarput

Danmarkip Pakistanimi aallartitaqarfianik qaartartumeerinermut Afghanistanimi Al-Qaida akisussaasuulluni ippassaq nalunaarpoq. Internettikkut nalunaarut naapertorlugu qaartartumeerineq Muuamaap titartakkatigut ilaarutigineqarneranut akiniaaneruvoq utoqqatsertoqanngippallu Al-Qaida-meersut Danmarkimut saassussinissaminnik suli sioorasaarillutik.
Allattoq Mads Lynge
juunip 05-at 2008 17:34

Hans Jørgen Bonnichsen, Danmarkimi isertortumik paasiniaasartunut pisortaasimasoq oqarpoq, qunusaariniarneruinnaagallartoq. Ajortumeeriniat qunutitsineq sakkutut atortarmassuk, missingersuusiussagaanni qunutitsineq sakkugisamik 95 procentiisut atortaraat 5 procentilu qunusaarinerminnik piviusunngortitsinertut sakkugisaraat. Danskit politikeriisa killiliiffigineqanngitsumik oqarsinnaatitaanermut isummatik allanngortissagaat Al-Qaidameersut qunusaarinermikkut kissaatigaat. Al-Qaidameersut ima amerlatiginatillu pissaaneqartiginngimmata toqqaannartumik Danmarkimi illoqarfiit arlaanni ajortumeeriniarnissaat qunugissallutigu, aammami Danmarkimi isumannaallisaanerput annertoqaaq, Hans Jørgen Bonnichsen oqarpoq.

Ilisimatuungorniaq Martin Harrow, islamimut upperluarniartut sakkulersorumatuut pillugit immikkut ilisimasalik oqarpoq aamma nammineq Al-Qaidap Danmarkimi ajortumeeriniarnissaa ilimananngitsoq. Ilimaginngilluinnarpaalu nunap assinga qimerluuinnarlugu sumi saassusinissaminnik aalajangersuisinnaasunik Pakistanimi inoqarnissaa. Aappaatigulli nunani allani ajortumeeriniassamaartoqarfiusuni Danskit soqutigisaasa ulorianartorsiornissaat ilimanarnerulersinnaavoq. Assersuutigineqarsinnaavoq ajortumeerinianik Irlandimiittoqaruni Skotlandimiittoqaruniluunniit, nunani taakkunani Danskit soqutigisaat saassukkusunneqarnerulissapput.