Danmarkip Nunarput aatsaat qinnuteqaassussinnaavaa!
Aatsitassanut pisortaqarfimmi pisortaq Jørn Skov Nielsen oqarpoq Nunarput massakkumut nammineerluni qinnuteqarsinnaanngitsoq Nunarput Danmarkip ataaniittutut Kyotomut isumaqatigiissuteqarmat.
Aalisarnermut isumaqatigiissut kisiat aallaavigissagutsigu Nunarput nunani EUp avataaniittutut inissinneqartarpoq. Kyotomulli isumaqatigiissummut atatillugu nunarput Danmarkimut atasutut naatsorsuussaavoq.
Ullup qeqqanut radioaviisimi oqarpugut Nunarput EUp avataaniittutut allatulli CO2 kvotenik piniarsimasinnaagaluartoq. Taamaattoqanngilarli Nunarput Danmarkip Kyotomut isumaqatigiissutaanut qilersorsimasuuvoq, Savalimmiut tassunga ilaatinniarneqarnani akerlianik nalunaarnikuusoq.
2012-imiit atulersussanik massakkut akeqanngitsumik kvotenik pissarsisoqarsinnaanngilaq, massakkummi aatsaat taakkua isumaqatiginniutaammata, Jørn Skov Nielsen oqarpoq. Nunat siuarsimasut 1990-imi atorsimasaat tassa taakkua ullumikkut akeqanngitsumik CO2 kvotetut pissarsianik taaneqartarput, tassalu taakkua Danmarkip pissarsiani 21 procentinik 2012 tikitsinnagu annikillisarniarlugit neriorsuinikuuvoq, Aatsitassanut pisortaqarfimmi pisortaq nassuiaavoq.
Tassa Danmarkip 1990mi CO2mik aniatitai massakkut akeqanngitsumik pissarsiatut taaneqartarput 2012llu tungaanut atorneqarsinnaallutik. Taamaammat Kalaallit Nunaata Danmarki isumaqatiginninniarfigisussaavaa, Kalaallit Nunaat akeqanngitsunik CO2 kvotenik pissarsiniassammat, taakkualu Danmarki aqqutigalugu aatsaat isumaqatiginninniutaasussaapput.
Nunatta Tunuata avannaani Kitaanilu uuliamik peqartoqarneranik naatsorsukkat malissagaanni nunatta pisariaqartissavai ukiumut 10 million tonsit CO2 aniatissallugit. Taakkualu tassa Danmarki ukiumut aniatittagaanik 2,2 million tonsinik annertunerujussuusussaapput, Danmarkillu neriorsuutiginikuuvaa taakkua nammineq atukkani 2012 tikitsinnagu annikillisinniarlugit.
