Danmarkip IWC-mut ilaajunnaarnissani qunusaarutigaa
Kalaallit Nunaata arfattassani qipoqqarmik ataatsimik tikaagulliusaanillu qulingiluanik illuinnarsiorluni ilanikuuvai, tamannalu Arfanniarneq pillugu Ataatsimiititaliarsuarmit, IWC-mit, ukioq naatinnagu akuerineqanngippat, Naalagaaffeqatigiit Arfanniarneq pillugu Ataatsimiititaliarsuarmut ilaasortaajunnaartinniarlugit Danmarkimi naalakkersuisut aalajangernerat piviusunngoriaannaavoq.
Nunanut allanut tunngasunut Danmarkimi ministerip, Villy Søvndalip, Radioaviisimut ualigaa tamanna erseqqissaatigaa. Aamma erseqqissaatigaa tamanna Folketingimi tapersersorluarneqartoq.
Danmarkimi nunanut allanut tunngassuteqartunut tamanna isumaqarluinnarpoq: Isumaqatigiissummut ilaagaanni - uani arfanniarneq pillugu isumaqatigiissut eqqarsaatigineqarpoq - taava malittariasassat malinneqassapput. Taamaaliorsinnaanngikkaanni taamaaliorusunngikkaanniluunniit, isumaqatigiissummit tunuartariaqarpoq, Villy Søvndal oqarpoq.
Isumaqatigiissullu Danmarkimit unioqqutinneqarpoq, Kalaallit Nunaatami arfattassaminik illuinnarsiorluni amerliinera, Arfanniarneq pillugu Ataatsimiititaliarsuarmi ilisimatusarnermut ataatsimiititaliap aamma akuersaarlugu, Danmarkip tapersersortuarpaa.
- Taamaammat arfattassat amerlineqarnissaannik Kalaallit Nunaata itigartitaanera naleqqutinngilaq, tamannalumi Danmarkip ataatsimiititaliamut EU-mullu paasitereerpaa, Kalaallit Nunaatalu amerlanerusunik arfattassaqarusunnera EU-mit aamma akuersaarneqanngilaq.
Folketingimut ilaasortat marluk, Doris Jakobsenip, Siumumeersup, aamma Sara Olsvigip, Inuit Ataqatigiinneersup, Kalaallit Nun aata Arfanniarneq pillugu Ataatsimiititaliarsuarmi ilaasortaaginnarnissaa neriuutigaat. Taakkumi ernummatigaat, ilaasortaajunnaassagaluarpat pisuussutinik uumassusilinnik ingerlatsineq Danmarkip ajoqusersulissagaa.
Villy Søvndal tamanna pillugu oqarpoq, Arfanniarneq pillugu Ataatsimiititaliarsuaq nammineq ilisimatuuni qaammatini tulliuttuni tusaaniassagai, aammagooq Savalimmiut Kalaallit Nunaallu ataatsimeeqatiginiarpai.
