Danmarkip issittumi politikkia isornartoqartinneqarpoq
Ruslandip, Canadap, Norgep, USA-p, Danmarkip Kalaallit Nunaatalu nunanut allanut naalakkersuisui Ilulissani 2008-mi naapipput. Tassani issittumi akersuuttoqannginnissaa anguniarlugu Danmarkip angusaa nersorneqarmat Martin Breum alapernaattunut ilaavoq, kingusiinnaali aatsaat paasisimavaa sammineqartut ilaat tusagassiortunit itisilerneqanngitsut.
- 2008-mi pisut persuarsiutissaapput. Taamaakkaluartoq issittup mingutsinneqannginnissaa namminneq akisussaaffiginiarlugu aalajangernerat illuatungeqarpoq. Naalagaaffiit tallimat namminneq issittumi aningaasatigut annertuunik soqutigisaqartut issittup mingutsinneqannginnissaanik nakkutilliinissaat, ilisimasassarsiortunit, kattuffinnit nunallu allat naalakkersuisuiniit iluarineqannilaq. Tamatumali oqallisigineqarnissaa unitsiinnarneqarpoq, Martin Breum oqarpoq.
Assersuutigalugu sikuiuitsoq kujallermi mingutsitsinnginnissaq nunat tamat suleqatigiillutik isumagisaraat. Issittumi mignutsitsinaveersaarneq Arktisk Rådimit sukumiisumik isumagineqarsinnaanera Martin Breumip ilimaginngilaa, Arktisk Råd politikkikkut sanngiippaarsorigamiuk.
- Arktisk Rådip sulinera eqarpallaaqigami avatangiisit mingutsinneqannginnissaannik sulinerat pitsaanerusinnaagaluarpoq.
Nunarsuit immikkoortut immap naqqani killingisa nalunaarsorneri killeqarfilerngusaannermi naapertorneqarnissaannik Danmarkip siunnersuuteqarnermigut Kalaallit Nunaata avannaani 150.000 kvadratkilometerisut angitigisoq killeqarfiup iluaniittutut nalunaarsorneqartikkusuppaa - tassa qalasersuaq ilanngullugu. Amerikallu "nassaarineqarnerata" kingorna nunamik aatsaat taama atsigisumik piginnittuuniartoqarpoq. Aperisoqarsinnaavorlu sooq taamatut piumasaqartoqarnersoq.
- Taama piumasaqaateqartoqarsinnaammat, Martin Breum oqarpoq. Tamassuma takutippaa, Danmarkip piffissami kingullermi killeqarfini illersorniarsarigai, periarfissaqarpallu avammut nuutsinniarsarigai. Danmarkip Kalaallit Nunaannut attaveqarnini qanoq eqqarsaatigineraa Kalaallit Nunaatalu siunissami Danmarkimiit avissaarsinnaaneranut periarfissiiniarneq tamakkununnga takussutissaasinnaavoq, Martin Breum oqarpoq.
