Danmarkip isiginerlunneqarnera pitsanngoriartorpoq

Muuamaat ilaarutigalugu titartakkat pissutigalugit muslimit akornanni Danmarkip isiginerlunneqarnera pitsanngoriartorusaarpoq.

Tassami danskit tunisassiaat pisiniarfinni tuniniarneqaqqilissapput, soorlu immunnit tunisassianik ingerlatsivissuaq Arla paasisitsiniaalluni aallartippoq; nunat muslimiusut danskit immummit tunisassiaannik tuniniaaqqilerniassammata.

Danmarks Radiup Kangiani Qiterlermi ilanngutassiortua Steffen Kretz Beirut-imi imaluunniit Amman-imi pisiniarfinni danskit tunisassiaannik takussaasoqarsoralugu aperineqarpoq.

Pisiniarfissuarni danskit tunisassiaat takussaaqqilerput, tassa immummit tunisassiat, immussuit assigisaalu takussaaqqilerput. Aamma neriniartarfinni danskit immummit tunisassiaat nalinginnaasumik pineqarsinnaaqqilerput, Steffen Kretz oqarpoq.

Tassa oqartoqarsinnaavoq danskit tunisassiaat akuerisaaqqilersut, kisianni danskinik isiginninneq allaavoq.

Muuamaat ilaarutigalugu titartakkat ajornartorsiortitsinngikkallarmata, Danmarkimeersuulluni oqartoqaraangat inuit paatsuungasarput.

Ajornartorsiuleruttulernerup nalaani inuit danskinut akeqqersimaarput, ilaatigut pisunik tv-kut takutinneqaqattaartunit, soorlu erfalasunik ikuallaanernit sunnersimaneqarlutik akeqqersimaarput.

Maanna taamatut kamassimaarneq qaangiussimavoq.

Taamaattorli inuit Danmark pitsaanngitsumik eqqaamagaat malunnarpoq.

Siornatigut Danmark sumiinnersoq ilisimaneqarpianngilaq, maannali Danmark eqqaaneqaraangat inuit eqqarsartarput, tassa ilissimaannaa profeterput mitaatiginikuuarsi, Steffen Kretz Jordanimiit taama oqarpoq.