Danmarkip arfanniartartuunera isummerfigineqartariaqarpoq

Danmarkip arfanniartartuunera avatangiisinut ministerip, Connie Hedegaard-ip, nunanullu allanut ministerip, Per Stig Møller-ip, isummerfigisariaqarpaat. Taama isumaqarpoq Inuit Ataqatigiinneersoq, Folketingimullu ilaasortaq, Kuupik Kleist.

Arfanniarneq pillugu ataatsimiititaliarsuup, IWC-p, ukiumoortumik ataatsimiinnginnerani Kuupik Kleist paragraf 20 malillugu ministerinut apeqquteqaatinik nassiussaqarpoq.

Arferit qanoq amerlatiginerannik kisitsisinik tatiginartunik Danmark qulakkeerinnissinnaanersoq Avatangiisinut ministerip akissuteqarfigissavaa. Tikaagulliusaat qilalukkallu pillugit kisitsisit ilisimasallu nunatsinni amigarneri ukiuni arlalinni IWC-mit uparuarneqartarpoq, ukiullu tamaasa kissaatigineqartarpoq arferit taakku qanoq amerlatiginerannik iluamik ilisimasaqarnissaq.

Kissaatigineqartut taakku Danmarkip qanoq ililluni qulakkeersinnaavai? Kuupik Kleist aperivoq.

Danmarkip pisortatigoortumik isummaminik allanngortitsinnginnissaa Kuupik Kleistip Per Stig Møllerimit aamma qulakkeerusuppaa. Nunatta Savalimmiullu soqutigisaasa akerliannik Danmarki ataatsimeersuarnermi kingullermi isummerpoq.

Piniarnermut aalisarnermullu pisortaqarfimmi pisortaq Amalie Jessen taamani oqarpoq Danmarkip isummaminik allanngortitsinera Danmarkimut tatiginnikkunnaarsitsisoq suleqatigiissitanullu nalorninartorsiortitsisoq.