Danmarkip aallartitaqarfia qaartartumeeriffigaat

Ullaaq Kalaallit Nunaanni nalunaaqutaq tallimat qaangilaaraa, Pakistanimi nalunaaqutaq ataaseq qaangilaaraa, Danmarkip Pakistanimi aallartitaqarfiata qaartartumeeriffigineqarnera pillugu tusagassiorfinnut nalunaartoqartalerpoq. Aallartitaqarfiup silataani biilit uninngasut qaarmata akisuanera Islamabad-imi tamarmi tusaaneqarsinnaavoq. Qaartitsisoqarsimatsiaannartoq ambulancet takkupput, taamaalinerani aallartitaqarfiup silataa igalaaminernik, saviminernik biilinillu ikuallassimasoqaqaaq. Aallartitaqarfiup silataani inuppassuit uivertut, qaartitsinermiit pujoq qernertoq sumi tamaniit takuneqarsinnaavoq. Aallartitaqarfiup aqqusinermiit assiaqutaa qarmaq qaartartumit putuneqarpoq, qaarfianilu aqqusinermi meteritut angitigisumik itersilluni. Danskit EU-llu erfalasui aallartitaqarfiup silataani erfalarujoorsimasut 1.salimi aneerasaartarfimmi nivingapput igalaallu tamarmik sequmissimallutik. Naalagaaffiit Peqatigiit ineriartortitsinermut allaffeqarfiani atorfilik, Muhamed Salim, qaartitsisoqarsimatsiartoq orniguttoq oqaluttuarpoq, sumi tamaani aak takussaasoq orpiillu ikuallattut, massa qarmat suli silaannarmiit torartut.

- Ikioqqusunik tusaagama inuit tallimat aammik qeqqanni nalasut takuakka, Salim oqaluttutarpoq.

Qaatartumeerinermut akisussaasut kikkuunersut suli paasineqanngilaq. Nunanulli allanut ministeri, Per Stig Møller oqarpoq, naalagaaffiit killiit islamisiortullu akornanni pissutsit kikkuugaluarnersut ajortisarniaannaraat.