Assi: Udenrigsministeriet

Danmarkip 20-riaataatut angitigisoq piumasaqaatigineqartoq

Naak Qalasersuup tungaani Danmarkip Nunattalu Naalagaaffiit Peqatigiinnut piumasaqaatiginiagaani aatsitassanik nassaarnissaq ilimanarpianngikkaluartoq, naalagaaffeqatigiit killeqarfeqarfiisa allisinnissaat pissutissaqarluartoq, danskit nunanut allanut tunngasunut ministeriat isumaqarpoq.

895.000 kvadratkilometerit - tassa Danmarkip annertussusiata 20-riaataa.

 

Nunatta Danmarkillu pigilerumallugu ataatsimoorlutik Naalagaaffiit Peqatigiit imartanik piginnittussaanermut ataatsimiititaliarsuanut piumasaqaatiginiagaa tassa taama angitigaaq. Ilisimatuussutsikkut misissuereernermi naalagaaffeqatigiit imartaasa allissutigisariaqagaa Qalasersuup tungaaniittoq taamaassaaq.

Imartarujussuarmullu piginnittuunissamik suaarutiginninnissaq pingaaruteqartoq, danskit nunanut allanut tunngasunut ministeriat Martin Lidegaard isumaqarpoq. Aamma taamaappoq, naak tamaani aatsitassanik ikummatissanillu nassaarnissamut ilimanaatit ilisimatuut mikisunnguatut nalileraluaraat.

AAMMA ATUARUK

 

- Naalagaaffeqatigiit angineruleriartortillugit, Danmarkip Nunattalu tamaani aqutsinermut sunniuteqarsinnaanermut periarfissai alliartussapput. Tassalu siku aappat tamannalu angallaffiulerpat angallaffiunissaa qanoq aqunneqassava? Tamaani pinngortitaq uumasuilu qanoq illersorneqassappat? Aalisarneq qanoq aqunneqassava? Naak qanoq pisuussuteqartiginersoq ilisimanngikkaluarlutigu, tamaani ineriartornerup sapinngisamik annertunerpaamik sunniuteqarfiginissaa soqutigisaraarput, Martin Lidegaard oqarpoq.

 

Russit kamassaatiginavianngikkaat

Imartaq Naalagaaffeqatigiit piginnittuuffigilerumasaat Qalasersuup tungaanut imartarujussuup annersaara Ruslandip immami killeqarfianut allaat killilluni. Naallu Nunat killiit Ruslandilu Ukrainemi sorsuunneq pillugu allatigullu aaqqiagiinngissuteqaraluartut, Danmarkip Nunattalu piumasaqaataat, russit kamassaatiginavianngikkaat, Martin Lidegaard isumaqarpoq:

- Piumasaqaatigut Ruslandimut, Canadamut Norgemulluunniit qinngasaarutitut isiginngilakka. Ilulissani 2008-mi isumaqatigiissummi malittarisassat maleqqinnaarpagut. Tassanilu isumaqatigiippugut, paasissutissat nunap pissusaanut tunngasut ilisimatuussutsikkullu katersat saqqummiuteqqaassallutigit. Taakkualu Naalagaaffiit Peqatigiinni ataatsimiititaliarsuarmit arlaannaannulluunniit attuumassuteqanngitsumit akuerineqassapput. Taava killeqarfiit sumiinnissaannik politikikkut isumaqatigiinniarnerit aallartissapput. Kisianni tamakkua ukiut qulit immaqaluunniit allaat ukiut 15-it qaangiuppata aatsaat pissapput, kisianni ilisimalikkavut nunap pissusaanut tunngasut soorunami tunngaviussapput. Saqqummiussavut politikkertaqanngillat ilisimatuussuseruna.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat