Danmarkimut umiarsuakkut nassiussineq akisunerulissaaq
Royal Arctic Line nittartakkamini taama allaaserisaqarpoq.
Nunatsinnit Danmarkimut nassiussat nalikinnerusut 50 kiilut ataallugit oqimaassusillit pillugit maleruagassaq siornatigut sukanganngitsuusimavoq, RAL-ili naapertorlugu maleruagassaq taanna Danmarkimi SKAT-imit (akileraartarnermut oqartussaasunit, aaqq.) atorunnaarsinneqarpoq.
Taamatut pisoqarneratigut pigisanik nassiussat, nassiussat utertinneqartut imaluunniit iluarsaatassanik nassiussat pineqartinnagit akitsuummik momsimillu siunissami akiliisoqartalissaaq.
Tamatumani ilaatigut tunissutissatut Danmarkimut nassiunneqartut eqqorneqassapput, tunissutissap nalinga aallaavigalugu akitsuummik momsimillu akiliisoqartalissammat.
Inuussutissarsiornermulli attuumassuteqanngitsumik qerisunik nassiussat matumani eqqugaassanngillat, taakkununnga immikkut ittumik aaqqissuussineq atuutiinnassammat, umiarsuaatileqatigiiffik taama allappoq.
