Assi: KNR

Isumaqatigiissut: Danmarkimut Kalaallit Airportsimi pissaaneqalersitsisoq

Danskit naalagaaaffiat Kalaallit Airportsimut sunniuteqarsinnaangaatsialissaaq. Tamanna Inuit Ataqatigiit Partii Naleqqallu akerleraat.

Danmarkip mittarfinnut pilersaarutinut katillugit 1,6 milliardit koruuninik tapersiinera danskit naalagaaffiata Kalaallit Airports A/S-imut sunniuteqangaatsialerneranik kinguneqassaaq.

Tamanna Naalakkersuisut siulittaasuata, Kim Kielsenip Aningaasaqarnermut Akileraartarnermullu Ataatsimiititaliamut nassiussaani, Danmarkimut Kalaallit Airportsimik piginneqatigiinnissamut isumaqatigiissuteqarnissamut piumasaqaatit takutippaat.

Danskit mittarfinnut tapersiinerat

  • Danmark Nuummi Ilulissanilu 700 millionit koruuninik aningaasaliinissamut piareersimavoq. Naalagaaffiup taamaalilluni mittarfiit 33,3 procentimik piginneqataaffigilissavai.
  • Tamatuma saniatigut Nordiske Investeringsbankimut 450 millionit koruuninik atorniartoqassaaq, naalagaaffillu atornermut qularnaveeqqusiisuussalluni, taamaalilluni erniat  mikinerusinnaallutik.
  • Kiisalu allanik aningaasaliisoqartariaqarneranut pisariaqartunik naalagaaffik 450 millionit koruuninik akikitsumik atortitsiniarpoq.

Isumaqatigiinniarnerit suli ingerlapput, Naalakkersuisulli Aningasaqarnermullu ministereqarfiup immikkoortut qulingiluat maannamut isumaqatigiissutigigaat, Siulittaasup Naalakkersuisoqarfia paasissutissiivoq.

Danmark ingerlatsiviup malittarisassaanik allannguinissamut ingerlatsivimmilu sulianik tunineqartussanut ilaatigut itigartitsisinnaatitaalissaaq.

Aammalu Namminersorlutik Oqartussat naalagaaffiullu ‘aningaasaqarnermut aalajangiinernullu tunngatillugu periusissiat, illuatungeriit aningaasaliinerisa illersorneqarnerannut pingaaruteqartut’ isumaqatigiissutigissavaat, - tassa Danmarkip Nuummi Ilulissanilu mittarfinnik ingerlatsinermi aningaasaliinermilu aarlerinarsinnaasut aalajangiiffiginissaat naaggaarsinnaavai.

 

Danmarkimut Kalaallit Airports A/S-ip piginneqatigiissutiginissaanut isumaqatigiissuteqarnissamut piumasaqaatit

IA: Nunatta mittarfiit tunniuppai

Naak Namminersorlutik Oqartussat 67 procentimik piginneqataasut, Danmark Nuummi Ilulissanilu mittarfinnik 33 procentiinnarnik piginneqataaleraluartoq, Namminersorlutik Oqartussat isumaqatigiissuteqarnikkut aannaasaqangaatsiassasut, Inuit Ataqatigiit (IA) isumaqarput.

Tassami Danmarkip Nuummi Ilulissanilu mittarfinnut aningaasaliineranik illersuiniarluni Kangerlussuup Narsarsuullu mittarfiisa matuneqarnissaannik, isumaqatigiissut isumaqartoq, IA isumaqarpoq.

AAMMA ATUARUK Mittarfiliortiternissaq akuersissutigalugu taasissutigineqariaannanngortoq

- Isumaqatigiissummi qulaarneqarsimammat akilersinnaanngitsumik ingerlatat inissaqartinneqassanngitsut, IA mittarfinnut pilersaarutip pingajussaaneerneqarnissaanut oqaaseqaammini allappoq.

IA-p mittarfinnut pilersaarut Danmarkimullu piginneqatigiinnissamik isumaqatigiissuteqarnissaq pillugu taasinianngilaq.

Naleraq: Naalakkersuisut Danmarkimut isumaqatigiinniarnerit sivitsorsarpaat

Partii Naleqqap Namminersorlutik Oqartussat danskillu naalagaaffiata akornanni piginneqatigiinnissamik isumaqatigiissuteqarnissami immikkoortorpassuit aamma akuerinianngilai. Ineriartornermut kigaalaqusersuutaavoq, Tamanna naalagaaffiup Air Greenland A/S-imut piginneqataaneratigut assersuutissartaqartoq, partii isumaqarpoq.

Partii Naleqqap tunngavippiaatigut illoqarfiit allaanerusumik aaqqikkusuppai, illoqarfiit amerlanerusut 1199 meterinik takitigisunik mittarfilersornusullugit.

 

AAMMA ATUARUK Piginneqataassutit pillugit isumaqatigiissut Inatsisartuni oqallisigineqarnissaa pissutissaqanngilaq

Taamaammat mittarfinnut pilersaarutip itigartitsisustigineqarnissaa, partiip kissaatigaa.

Aningaasaqarnermut Akileraartarnermullu Ataatsimiititaliap Danmarkimut piginneqatigiissuteqarnissamut isumaqatigiissut atsiorneqartinnagu takorusukkuniuk takoqqaarsinnaagaa, Kim Kielsenip ilisimatitsissutigaa.

 

Kisianni Naalakkersuisoqatigiit Demokraatillu mittarfinnut pilersaarut sisamanngorpat akuersarulugu taasissutigippassuk, piginneqatigiinnissamut isumaqatigiissut akuerineqariissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat