Danmarkimut ilinniariat sisamat unnuiffissaaruttut

Ilinniartut sisamat, Danmarkimut atuariartortut ataasinngormat erloqinartorsiortinneqarput.

Qillaq Adolfsen IT-mik aqutsinermut ilinniartuuvoq. Danmarkimi Viborgimut atuariartortunut ilaalluni. Københavnimi unnuisussaallutik tikereernermik kingorna unnuiffissaminnut ornigupput, pakatsisinneqarpulli.

- Hotelimut iseraluaratta, saaffiginnittarfimmit oqarfigineqarpugut inissarput akilerneqarsimanngitsoq. Unnuiffissatsinni ineqarsinnaanngitsugut oqarfigineqarpugut.

Qillaq Adolfsen taama oqarpoq.

Unnuisarfimmi inissaqartitaannginnertik Savimilerinermut Ilinniarfimmut nalunaarutigaat, nalunaarfigineqarput unnuisarfimmut allamukassasut.

Savimminilerinermik Ilinniarfiup unnuiffissaq taasaat Qillaq Adolfsenip atuaqataasalu ornippaat. Aamma tassani pakatsisinneqaqqipput, aammagooq unnuiffissaat akilerneqarsimannginnami.

Qillaq Adolfsen atuaqatinilu ataatsimut akileeqatigiillutik unnuiffissaminnut akiliiginnartariaqarsimapput.

- Iluamik ineqarnissatsinnut tunngasut misissorneqarnnginneri pakatsinalaarpoq. Kisianni atuarfitsinnut apuunnissarput anguarput.

Ulapinneq pissutigalugu taama kukkusoqarsimasoq, Saviminilerinermik Ilinniarfimmit oqaatigineqarpoq.

- Atuartut ineqarnissaannut inniminniinermi kukkusoqarsimavoq. Taamaattumik atuartut unnuisarfimmi inissaqarsimanngillat. Atuartut nammineerlutik unnuisarfimmi unnuinertik akilissanngilaat. Nalinginnaasumik uagut atuartut inniminniissuttarpagut, ajoraluartumilli matumunnga tunngatillugu inniminniinermi kukkusoqarsimavoq.

Savimmilerinermik Ilinniarfiup pisortaa Michael Sørensen taama oqarpoq.