Danmarkimut aallartitsisarnertik unitsinniarlugu sullissisussanik ilinniartitserusukkaluarput

Qeqqata Kommunia meeqqanik inuusuttuaqqanillu inuuniarnermikkut ajornartorsiuteqartunik, Danmarkimut aallartitsisarnertik unitsinniarlugit sullissisussanik ilinniartitserusukkaluarput, tassami Danmarkimut aallartitsisarneq meeqqamut angajoqqaavinullu innarliinerummat annertooq. Ilaqutariinnermut Ilinniartitaanermullu Qeqqata Kommuniani pisortaq, Vibeke Møller Jensen oqarpoq.

- Meeqqap nunamut allamut allaartinneqarnera innarliinerusoq isumaqarpunga. Tassami tikitaa allatut oqaaseqarput allatullu kultureqarlutik, tamannalu assut ajornartorsiutaasarpoq. Meeqqamuinnaanngitsoq tamanna ajornartorsiutaavoq aammami taasuma ilaqutaanut tamanna ajornartorsiutaasarmat, Vibeke Møller Jensen taama oqarpoq.

Meeqqat inuusuttuaqallu 14-it maanna Danmarkimiisinneqarput, Qeqqata Kommunianit ataaseq inissinneqarsimalluni, taassuma ikiorneqarnissaminut maani Nunatsinni periarfissaqartioqannginnera pissutigalugu. Taannalu Nunatsinnut uterusukkaluarpoq.

- Qeqqata kommunianit inuusuttuaraq ataaseq Danmarkimut aallartinnikuuvarput. Taannalu maanga Nunatsinnut uterusuttorujussuuvoq, tassami Danmarkimiinnini aliasuutigisorujussuuvaa. Maannakkorpiaq naluarput qaqugu taanna maanga angerlatissanerlutigu.

Meeqqanik inuusuttuaqanillu ajornartorsiutilinnik ikiuinissamut sulisussanik Qeqqata Kommunia ilinniartitserusukkaluarpoq, meeqqat inuusuttuaqqallu ikiorneqarnissaat maani Nunatsinni pisinnaaniassammat.

- Qeqqata Kommunianit sulissutigigaluarparput meeqqat inuusuttuaqaqallu maani Nunatsinni inissinneqarnissaat. Aamma taakkuninnga sullissisussat ilinniartikkaluarpagut tassami Danmarkiliartitsisarneq akisoorujussuuvoq taamaattumillu taamaaliortarnerput unitsinnikkusukkaluarlutigu, taama Qeqqata Kommuniani Ilaqutariinnermut Ilinniartitaanermullu pisortaq, Vibeke Møller Jensen oqarpoq.