Danmarkimut aallartitsisarnerit oqallinnermi sammineqarput

Meerarsianngortitsinerit, parnaarussassanngortitsinerit innarluutilinnillu Danmarkimut aallartitsisarnerit, tamakkuupput Ilisimatusarfimi ippassaq oqallinnermi sammineqartut ilaat.
septembarip 18-at 2010 15:59

1950-ikkut aamma 1960-ikkut pillugit oqallinneq piffissami kingullermi tusarsaaqaaq. Tamannarpiarlu tunngavigalugu Ilimmarfik qaaqqusisimavoq oqalugiartussanik tassaasunik: Tine Bryld, Ole Møller, taanna Herstedvesterimi parnaarussaasimasoq aamma tarnip pissusiinik ilisimasalik, Marius Inuusuttoq Kristensen:

- Nammineq isumaga naapertorlugu sorsussimaqaanga. Anguniakkama annerpaartarisimavaat, meerarsiatut imminut isiginnginnissara, naak taama eqqarsarneq annernaraluartoq. Imminut ikiussaguma, misigisimaneq taamaattoq qimattariaqarlugu aalajangersimavunga.

Taama oqarpoq Marius Inuusuttoq Kristensen, ullumikkut tarnip pissusiinik ilisimatooq.

50-ikkut aallartilaarneraniit 60-kkut qiteqqunnerata tungaanut Marius Inuusuttoq Kristensen arnarsianilu Aasianni najugaqarput. Ukiut kalaallinit eqqaamaneqarnerpaassagunartut nalaanni. Taamani politikkikkut iliuutsit ilagaat, meeqqanik Danmarkimut avatsitsisarnerit, soorlu timimikkut tarnimikkullu nappaatilinnik. Avalattut ilagaat meeqqat danskinit meerarsianngorsimasut. Taakkulu amerlanerpaartaasa angajoqqaavi ilisimatsinneqartarsimanngillat meeqqami meerarsianngortarsimanerinik. Tamakkulu ilagaat Marius Inuusuttoq Kristensen, qanoq ililluni ullumikkut ilinniagartuutut inuuneqarnini angusimaneraa Marius Inuusuttoq Kristensen aperaa, akivorlu:

- Pisut assigiinngitsut angusaqarusussutsinnut sunniuteqarsimapput. Ilitsoqqussara nunarsuatta kusanassusia uannnut pingaaruteqarsimaqaaq. Meeraallunga meeraqatikka ikittunnguit pinnguaqatigisarneri aamma pingaaruteqarsimapput. Pingaarnerpaajugunarporli oqaluttuanut tusarnaarneq nuannarilluinnagara, oqaluttuaateqarnerpummi kalaallit kulturitsinni pingaartsinnerusatta ilaat, Marius Inuusuttoq Kristensen oqarpoq, nangillunilu:

- Taamani oqartussaasut iliuuserisimasaat kamaatigeqaara, uangut kultoorerput eqqarsaatigiinnarluguluunniit danskit ataasiakkaat pisariaqartitaat pissutigiinnarlugu taamaaliortariaqarsiomanngikkaluarput. Ukiuni nutaani taama misigisitsisoqaqqissanngitsoq neriuutigaara, Marius Inuusuttoq Kristensen naggasiivoq.