Danmarkimik suleqateqarneq Kuupiup nersualaarpaa
Pappialat nittartakkami Wikileaksimi CIA-mut tunngasut saqqummiunneqartut sunnguamilluunniit oqaaseqarfigiumanagit oqalugiarnermini erseqqissaatigaa, Kalaallit Nunaatali suleqatigisimasai tamaasa qutsavigalugit.
- Naatsumik oqaatigissagaanni Danmarkimik suleqateqarnerput pitsaasuuvoq aamma ukiorpassuarni suleqatigiissimavugut angusaqarfiulluartumik. Soorunalimi ajornartorsiutitaqartarpoq aamma aporaaffeqartarpugut,kisianni piginnaaneqarpugut oqaloqatigiinnikkut isumaqatigiinngissutsit qaangerniarsinnaanerannut, taamaattumik ataatsimut isigalugu oqassaat Danmakimik suleqqteqarnerput ajunngilaq, Kuupik Kleist oqarpoq.
Arlaannik aalajangersimasunik timitalersuisimavisi?
- Tassa massakkut annertuumik namminersulersimaneq siorna eqqunneqartoq timitalersorlugu ingerlapparput, ukiunilu aappaa affaq qaangiuttumi pingaartumik aatsitassarsiornermut tunngasut tassaasimapput namminersulernermi nutaarsiassaq annerpaaq ullunilu makkunanerpiaq aamma tamanna aallunneqarpoq annertuumik, Naalakkersuisut siulittaasuat nassuiaavoq.
Ilasseqatigiissitsinermi, immikkoortunut marlunut pernaammik avinneqartumut, qaaqqusat 200-nit amerlanerit takkupput. Ilasseqatigiinnermi siullermi aallartitat, ministerit Kalaallit Nunaannullu attuumassuteqartut allat peqataapput, aappaat kikkunnulluunniit ammalluni.
Peqataasunut ilaapput naalakkersuisut Ove Karl Berthelsen, Mimi Karlsen aamma Inatsisartut siulittaasuat, Josef Motzfeldt. Folketingip siulittaasua, Thor Pedersen, avatangiisinut ministeri, Karen Ellemann, kulturimillu suliaqartartut nuimasut, soorlu Rasmus Lyberth aamma Maria Paninnguaq Kjærrulff aamma ilaallutik. Erinarsoqatigiit Aavaat ilasseqatigiissitsinermi aliikkusersuipput.
Naalakkersuisut siulittaasuata ukiortaami ilasseqatigiissitsinerani Namminersorlutik Oqartussat sinniisoqarfianni eqqumiitsuliortut saqqummersitsinerat, Sila, ammarnersiorneqarpoq, tassaasoq Kalaallit Nunaanni eqqumiitsuliortut kattuffiata Kimik-up nalliuttoriorneranut atatillugu saqqummersitsineq. Saqqummersitat Nuummi, Sisimiuni, Ilulissani Qaqortumilu takutinneqareerput. Saqqummersitat Frankrigimi Savalimmiunilu kingusinnerusukkut takutinneqassapput.
