Danmarkimiit nunatsinnukalernermi akunnerit pingasut sioqqutsilluni tuniusseqqusisut
Corona ukiut marluk sinnerlugit atuutereersoq angallattut amerliartoqqilerput.
Silaannakkulli angallassinermi sulisut coronap nalaani ikilisagaasimasut amerliartoqqileraluarlutik suli malinnaaniarsuaarmata, mittarfinni aallalersut suli utaqqingaatsiartassapput.
Københavnimiit nunatsinnukaleruit aallarnissat akunnerpaalunnik sioqqullugu pisattavit Kastrupip mittarfianut tunniukkiartornissaat eqqumaffigissavat, pisattatimmi tunniutereerlugit isumannaallisaanermik misissuivikkuuleruit kinguleriiaarlutik utaqqisut amerleriarujussuarsimammata.
Nunatsinnukalersut ilaat Amalie Ostermann, aallarnissani akunnerpaalunnik sioqqullugu Kastrupip mitttarfianiittoq uppernarsaavoq:
- Sivisunalaartarpoq nunatsinnukarluni. Taamaattumik ullaakkut maannajaartarpugut arfernup missaani.
Amalie Ostermanimmi tusarsimavaa Kastrupip mittarfianukajaartariaqassalluni.
-Tassa taanna apeqqutaaginnaarpoq package qanoq sukkatigisumik tunniussinnaanersoq. Taava tuaviinnaq aamma tappikunnarluni. Utaqqisunut allatut ajornaqaaq ilannguttariaqarluni, Amalie Ostermann oqarpoq.
Isumannaalisaanermik misissuivimmut utaqqisorpassuusartut
Coronavirusip ukiut marluk matuma siorna nunarsuaq tamakkerlugu tuniluutilerujussuarneratigut silaannakkut angallanneq eqqugaammat, mittarfippassuarni sulisunik soraarsitsiortortoqarpoq, tamannalu aallartussat mittarfinni utaqisarnerujussuannik kinguneqarpoq.
Kastrupip mittarfiani sulisut amerliartoqqilerput sulisulli nutaat ilinniartinneqaqqaartussaammata aallartussat mittarfimmi suli sivisuumik utaqqisarallarnissartik naatsorsuugissagaat, mittarfimmi tusagassiinermut siunnersorti Rasmus Baad allappoq.
-Europami angalasussat akunnerit marluk sioqqullugit mittarfimmeereernissaat siunnersuutigaarput. Ungasinnerusunulli, soorlu Kalaalit Nunaaliartussat, aallarnissartik akunnernik pingasunik sioqqullugu mittarfimmeereernissaat innersuussutigaarput, Rasmus Baad allappoq.
Kastrupip mittarfiani utaqqisarnejussuup aasap ingerlanerani sivikillinissaa mittarfimmiunit naatsorsuutigineqarpoq.
Kastrupip mittarfia kisimi aallalernermi utaqqerujussuarfiusanngilaq, nunarsuummi sinnerani mittarfippassuit aamma taamaammata. Taamaattumik akunnerit arlallit sioqqullugit mittarfimmeereertarnissaq mittarfinnit arlalinnit aamma eqqumaffigeqquneqarpoq.
Ilanngutassiaq qulaani isiginnaarneqarsinnaavoq:
