Danmarkimiissimaneq inuiannut iluaqutaalluni oqaatsinut ajoqutaavoq
Naak Danmarkimiinneq meeqqat ilaannut naalliunnartortaqarsimagaluartoq inuiannut iluaqutaasimasoq, Danmarkimukartitsisaleruttornerup nalaani nunatsinni ilinniartitsisuusoq Ernst Jensen naliliivoq.
Meeqqat kikkut Danmarkimut aallartinneqassanersut pillugit aalajangeeqataasarsimavoq aamma pisimasut pillugit ilisimatuussutsikkut suliaminut atatillugu allaaserinnissimalluni.
1961-imi meeqqat 26-t Danmarkimut ukioq ataaseq atuariartortussat siulliit aallassallutik piareerput. Kingornalu holdit 15-it katillugit meeqqat 1600 sinillit aqqut taanna atorlugu Danmarkiliartinneqarput - qallunaatut ilinniassallutik uterunillu realskolemi ilinniagaqassallutik.
Taamanikkut ilinniartitsisuusoq Ernst Jensen ilisimatuussutsikkut suliaminut atatillugu allaaserinnissimavoq.
-Soorunami ajunngitsunik ajortunillu pisimasoqarfiuvoq kisianni aallartitsisarneq tamaat qiviaraanni iluatsippoq, Ernst Jensen naliliivoq.
Danmarkimut atuariartorneq qallunaatut ilinniarfiummat meeqqat inunnguutsiminnik oqaasii tunulliunneqarput.
-Ukioq ilivitsoq meeqqat Danmarkimiinnerminni soorunami kalaallisut ilinniartinneqanngillat, taamaammat soorunami oqartoqarsinnaavoq kalaallit oqaasii arlaatigut eqqugaasimassasut, Ernst jensen oqarpoq.
Meeqqat uteraangamik ilinniakkat akunnattumik sivisussusillit soorlu ilinniartitsisutut, tusagassiortutut, peqqissaasutut assigisaanillu ilinniarnerit qinertarsimavaat.
Ernst Jensenillu Danmarkimut atuariartortarnerup kingunerisimasai ullumikkut takusinnaalluarpai.
-Meeqqat ilarpassui ilisarisimasaraakka ilaammi atuartitarinikuuaakka, ullumikkullu takusinnaasakka malillugit atorfigissaartuupput. Inuiaqatigiinni sullisisooqataapput taamatullu inississimanerannut Danmarkimi ilinniarsimanerat pissutaavoq, Ernst Jensen oqarpoq.
1966-miit 1976-mut Danmarkimut atuariartorneq meeqqat realskolerniarunik piareersarfissatuaraat, taannaavorlu ilinniagaqarnissamut ammaassisuusoq, ajoraluartumilli meeqqat ilaat Danmarkiliarnissaminnut periarfissinneqanngillat, ilannguilu Danmarkiliartitaanngitsut pakatsisaqaat.
Danmarkiliartitaanngitsoortunik unnugu radioavisimitusagaqassaagut. Illillu nammineq Danmarkiliartitsisarneq pillugu oqaluttuassaqaruit nittartakkatsinnut knr.gl-mut allassinnaavutit.
