Danmarkimi uuliasiorneq soqutigineqanngitsoq
Kalaallit Nunaanni uuliamik ujaasineq ingerlanneqaleruttortoq Danmarkimi naalakkersuisut nukissiuutinik nutaanik ujaasinermut aningaasaliissutigisartagaat Danmarkimi ilisimatuunit ikippallaannerarneqarput.
Danmark manna tikillugu Nordsømit nammineq uuliamik gassimillu pilersorpoq Europamilu nunanit nukissiuuteqarnermi sipaallaqqinnernut ilaalluni.
Uuliali nungukkiartorpoq nukissiuutinillu nutaanik ujaasineq ilisimatusarnerlu naalakkersuisunit uninngatinneqarpallaartoq ilisimatuunit arlalinnit isumaqarfigineqarpoq.
Nunarsuaq tamakkerlugu nukissiuutit assigiinngitsut minguinnerusut akikinnerusullu siunissami atorneqarsinnaasut nassaariniarneqarput.
Lyngbymi Dansk Teknisk Universitetimi DTU-mi ilisimatuup Birgitte Arringip nukissiuut atorneqarluarsinnaasoq nassaarisimavaa. Misissuinermini oqartussanit aningaasaliiffigitinnissani naalliuutigingaatsiarsimallugu oqaluttuarpoq.
- Soqutigisaqanngilluinnarput. Siunissaq ungasinnerusoq aningaasaliissallutik soqutigisaqanngillat. Siunissaq qaninnerusoq eqqarsaatigalugu aningaasaliinissartik soqutigineruaat, Birgitte Arring oqarpoq.
Taassuma suliffissuaq Novo Science benziinamik minguinnerusumik akikinnerusumillu nassaarniarnermini suleqatigisarpaa.
- Novo Sciencep Danmarkimi misissueqqissaarniarnini ajornakusoormat USA-mut misissueqqissaarneq nuuttariaqarsimavaa, Novo Sciencemi pisortaaneq taama oqaluttuarpoq.
Danskit naalagaaffianit aningaasaliisussarsiorneq ajornakusoorpallaaqqimmat Birgitte Arringip USA-mut nuunnissi eqqarsaatigisimavaa. Nukissiuut nassaarisimasaa neriulluarfigineqarpoq iluatsilluassagunilu millionilikkaanik aningaasannassutaasinnaalluni.
Misissueqqissaarnerit aningaasaliiffigineqartariaqassapput, Ålborgip teknisk universitetiani nukissiuutit pillugit pilersaarusiortartut pisortaat Henrik Lund oqarpoq.
